Chin state, Paletwa peng ah Chin phungki pawl nih Chin khrihfa biakinn sak an sianh hna lo pinah missionary inn zong an khangh hrawh piak hna.
Mah missionary inn hi US ram, Omaha khuapi um Omaha Chin Christian Church le International Chin Baptist Mission (ICBM) nih an sak liomi asi.
Missionary inn cu Paletwa peng, Shwetaung (Mohchaungwa ti zongin auhmi) khua ah an sak. Paletwa peng, Thanhtaung khua ah ummi Chin phungki nih a hung khangh piak hna.
“Paletwa peng, Thanhtaung khua ah a ṭhumi Ashin Thanwara (a min taktak: Yan Myint Aung) timi Chin phungki cu November 26 ah Shwetaung khua ah a kal. Khuami buddhist 8 aa sawm hna i khua hriang ah sak liomi Chin missionary inn cu an phur pinah inn saknak thing vialte an khangh dih,” tiah ICBM nih tuni ah a phuan.
“2019 ah Omaha Chin Christian Church nih Shwetaung khuami cu biakinn sakpiak an timh hna nain ‘saknak nawl nan ngei lo, nan sa kho lo’ tiah khuami buddhist nih an ti hna caah rak ngol asi.
“Hnu ah, U Than Tun timi buddhist pakhat nih a zaangfah hna caah khua hriang um a inn hmun cu khrihfa caah a rak hlut. Cu hmun ahcun missionary umnak inn sak dingin khuapi meṭing ah nawl an hal i pe 18 sau le pe 15 kau nak kau loin missionary umnak inn sak dingin khuami an lungtling.
“Cuticun November 9, 2021 ah khuami hnatlak ningin 18’x15′ a kaumi inn cu sak hram an thok.
“Yangon ah tinṭan kaimi Chin buddist phungki pahnih (anmah Laymyo area minung) nih an theih tikah Laymyo area i a ṭhumi a dang phungki 4 an i sawm hna i Shwetaung ah an rak kai.
“Sa hlah uh tiah a phunphun in an tlerhkhonh hna. ‘Laymyo area ah Buddhist nih mission rian kan ṭuan hmasa bik i Shwetaung hi kan mission ṭuannak aa thoknak khua asi caah zei inn hmanh nan sa kho lo’ tiah an tlerh hna.
“Phungki pawl an kir dih hnu ah, khuami nih ṭha tein saknak nawl an kan pekmi asi ko lengah biakinn si loin minung umnak inn (missionary umnak inn) pei kan sak ko cu tiah pehzulh in an sak.
“Cu tikah, Thanhtaung khua i a ṭhumi Ashin Thanwara timi Chin phungki cu November 26 ah Shwetaung khua ah a va kai i khuami buddhist 8 aa sawm hna. Mah ni zaanlei 3pm fai ah inn sak liomi cu an hrawh i inn saknak thing vialte cu an khangh dih hi asi.
“Shwetaung (Mohchaungwa) ah a ṭuanmi ICBM Nurse Aid nih inn an hrawh lio le inn saknak ding thing pawl mei an khangh lio cu a phone in hman a thlak. Nain phungki pa nih cun cu sayama rawl a chuan lio ah a luhhnawh i a phone cu hramhram in a chuh.
“Ngandamnak rian a ṭuanmi hmanthlak telh in record a tuahmi vialte cu a hnawh (delele) piak dih — Atu langhtermi hmanthlak pawl hi pakhat khat nih a thlite in record a rak tuahmi a si i a hnu ah kan hmuh ṭhanmi a si.
“Hi thil kan tonmi hi amah nih cun an innka bi deuh seh tiah an tuahmi a si men lai. Nain, kau deuh in innka aa hunnak ding caah le a rian thiang thuk deuh in kan ṭuan khawhnak ding caah Pathian nih canter hram ko seh, ti hi kan thlacamnak a si. Thlacamnak in kan bawm cio hram u,” tiah International Chin Baptist Mission (ICBM) nih a chim.
