Chin State cozah lutlai thar a simi Pu Terence San Mawi Nikhuai cu lung zawtnak in ruahlo piin a nunnak liam tiah kan theih.
Ralkap nih NLD cozah uknak a chuh hnu in rampumpi state le region cozah rianttuan vialte a phuah dih hna i amah ukmi minung a ṭuanter hna.
Chin State cozah lutlai Salai Lian Luai zong a phuah i amah hmunhma ah Pu San Mawi Nikhuai a ṭuanter.
Pu San Mawi Nikhuai cu February 3 in riantuan hram aa thok i February 11 zingka ah Hakha ah lung zawtnak in a nunnak liam.
Chin State cozah lutlai rian a ttuan hi ni 8 chung te lawng a si rih i a luancia ni 2 ahkhan Naypyitaw zong ah meeting a va kai.
Pu San Mawi Nikhuai cu a thih ahhin kum 65 asi.
Pu San Mawi Nikhuai cu Chin state, Falam peng Lumte khuami asi. A pu hi Chin miphun chungah British ralkap chan ah ralbawi a rak ngah hmasabiktu Major Kap Cong a si.
A pa cu Dr. Ni Khuai a si i a nu hi British rammi a si.
NLD cozah chan ah Chin State Biaceihzung Sangbik biaceihtu a ttuanmi a si.
Ralap nih uknak a lak hnu in cozah kalning zong a thlen dih. ‘Chin State Government’ timi kha “Chin State Administrative Council” tiin hlan lio ralkap uknak chan ah an hman ningin a thlen. Liamcia kum 50 ah a kan kirpi kan ti lai cu.
Cun, “Vuancichoh (Chief Minister)” timi zong “Chairman of Chin State Administrative Council (siman-auhchoh-hmuh-kaungsi-auhkaṭhah)” tiin a thlen. – Chin World
