Mipi nih kan thimmi NLD cozah uknak a chuttu ralkap cu mipi nih thihnun ngamh in kan doh lio ah Pu Ngun San Aung cu ralkap nih hmunhma an pek i an lei ah a ṭang diam.
Ralkap nih Chin state uktu (Chin State Administrative Council Chairman) dingah an thimmi Pu Terence San Mawi Nikhuai cu February 11 zingka ah lungzawtnak in a thi.
Cucaah amah aiawhtu dingah ralkap nih CNLD Chairman Pu Ngai Sak le Pu Thla Hre an thim hna nain “mipi duh lomi ralkap cu kan duh lo” tiin an al.
Mah hnu ah Pu Ngun San Aung an chimh i vikvak a cohlan colh ko. Amah hmunhma hmuhnak asi paoh ahcun Chinmi mipi zei a rel hna lo ti a lang.
Pu Ngai Sak le Pu Thla Hre cu ralkap nih Chin state uknak nawl, lahkhah tampi, inn le motor le rumra an pek hna nain mipi an dawt ruangah an cohlang lo. Pu Ngun San Aung he cun van le vawilei bak an si ko.
Cun, Pu Ngai Sak le Pu Thla Hre cu naite November 8 thimnak zongah aa cuhmi an si.
Pu Ngun San Aung cu thimnak hmanh ah aa cuh ti lomi si … a zohchia ngai.
A rauh hlan ah ralkap chaktlaihmi Pu Ngun San Aung (Chin state uktu) nawlpeknak in Chin state cozah riantuan le ralkap duhlonak a langhtertu pawl hnahnawh, tlerh, tukvelh, tlaih le thongthlak an tong thluahmah lai – ngaih a chia ko.
Anih hi, ralkap bawi pawl nih mipi hlennak caah an uniform i phoih in an dirhmi USDP party member asi.
Hmasa ralkap (USDP Thein Sein) acozah lio zongah ralkap le USDP lei in Chin State Lamsul Vuanci a rak ṭuanmi si.
Sibawi le cozah rianṭuan pawl hmanh nih ṭih tuk bu tein ralkap duhlonak an langhter, mi tampi an rian an i phuak …
