Chin state Vuancichoh telhin Vuanci (4) cu thaizing February 5 zingka in vuanci inn in an chuak cang lai i anmah inn cio ah an ttin lai, tiah Chin state Zatlang Vuanci Pu Pau Lun Min Thang nih a chim.
Vuanci inn in a chuak dingmi pawl cu state Vuancichoh Salai Lian Luai, Planning and Finance Vuanci U We Kaw, Agriculture, Livestock, Forestry and Mines Vuanci Pu Mang Hin Dal, Lamsul Vuanci Pu Sui Tho le Zatlang Vuanci Pu Pau Lun Min Thang hna an si.
Vuanci Pu Pau Lun Min Thang nih, “U Soe Htet le U Phway Aa cu an thlah rih hna lo caah zeitin an si te lai cu kan thei rih lo.
“Kanmah cu thaizing chuak dingin kan i tim dih cang. Anmah fialmi paoh lawng tuah cu ka duh lo, official tein ca an chuah awk a si, a that zong ttha deuh hnga,” tiah a chim.
Chin state Vuanci pawl cu vuanci inn chung ah an hren hna i ralkap nih luhchuahnak gate in an cawngh hna.
Atu lio ahcun Sipin Vuanci U Soe Htet, Immigration and Human Resources Vuanci U Phway Aa, state hluttaw hruaitu Pu Zo Bawi le hluttaw hruaitu chang Pu Teik Thang hna cu ralkap nih an thlah rih hna lo.
“A har biknak le a fawi biknak hmun ah kan dir lai. Mipi he hmunkhat ah ttang tti dingin bia kan in kamh hna,” tiah Pu Pau Lun Min Thang nih a chim.
February 1, 2021 ah ralkap nih uknak a chuh i Vuanci vialte an rian a phuah dih hna. – Khonumthung
