Kayin hriamtlai phu KNU (Karen National Union) nih, “Kayin state cu kanmah tein kan i uk lai,” tiah a thanh.
“Ralkap nih hramhram in NLD uknak a chuh i a ser ṭhanmi ukhruainak hi kan cohlang lo. Kayin dothlennak hmun cu KNU nih kan sermi Kawthoolei uknak phungphai hmangin kanmah tein kan i uk lai,” ati.
“Kawthoolei” cu Kayin holh asi i “muihnak um lonak ram” tinak asi – Kayin hruaitu U Ba U Gyi nih kum 1949 ah Kayin state le Kayin miphun umnak Mon state, Bago region cheukhat le Irrawaddy tiva kuang hrawn vialte khi “Kawthoolei” tiin a rak auh i nihin tiang an hman.
“Kayin hriamtlai phu a simi DKBA le PC BGF, tbk. pawl cu KNLA he kan i fonh lai i Kawthoolei ralkap pakhat in Kayin mipi he mipi kan ven hna lai.
“Ralkap nih hramhram in uknak a chuhmi hi mipi zong nih cohlang hrimhrim hlah uh, ramdang zong nih cohlang hrimhrim hlah uh tiah kan in forhfial hna,” tiah KNU nih a thanh.
“NLD cu kum 2008 Phunghram a cohlang lo nain remh i zuam dingin 2010 le 2020 ah thimnak a lut.
“Nain, Rampumpi Kahngol Lungtlinnak ningin ramkhel biaruahnak in remh aa zuam i a remh kho lo. Hluttaw ah remh a timh nain a remh kho lo,” ti zong cathanh chungah a ṭial.
