CNF/A Ralbawi Solomon Thang Ding a nu Pi Ngun Fam, kum 85 cu March 21 zaan ah a nunnak liam tiah kan theih.
Ralbawi Solomon Thang Ding te hi unau chuak rual 6 an si, a nih hi fa lai a si.
“Atu lio boruak ruangah pumpak in ka nu ruak ka hmu kho lo. Cucaah, a lang tu in ka nu ruak cungah biacah le thlahnak bia ka chim,” tiah Ralbawi Solomon Thang Ding nih a Facebook ah video a tar.
Solomon Thang Ding: Ka nu hi keimah ruangah ah mi hmaikhap lo ngai in saupi a um. Nain, ka rianttuannak ah ka nu nih tha a ka pek peng. Cun, thla a ka campiak peng.
Kan unu upabik nih ka nu cu nihin tiang a pawng tein a umpi, a zohkhenh. Kei hna nih cun ka nu hi hei cawm le hei pek chinchin cu zeihmanh ka ti kho lo.
Amah tu nih pension a eimi hi a chel caan ah a ka kuat tawn. Hika ka phak hnu zong hin a rawl ttam lai tiin a pension hmuhmi te cu a ka kuat tawn. Kaa lawm ngai.
Ka nu biatak tein a dam lonak hi ni kum in si cang. Ramchung, ramleng um cingla, rawlchan, ka tule le hawikawm nih tangka in an rak bawmh. Bawmtu vialte nan cungah lawmhnak tampi ka ngei.
Atu lio kan rampi boruak cu a biapi tuk lio a si i keimah ka chim hlan ah tampi nan theih cang ko lai. Kha kha ruangah ka ra kho lo.
Keimah ai ah ramchung, ramleng in siseh, a khuakip khualei in a rami khuami, cingla rualchan, hawikawm nan um ko caah ka hnangam ngai.
Ka nu zong hi keimah hitin ka rat khawh lomi hi a siaherh tuk lai ti ka zum lo.
Zeica ti ahcun, keimah caah thla a cam pengmi, keimah caah a ingtuar pengmi le ram ca rian kan ttuannak ah tha a ka pengmi a si.
Ka nu, rak kan kal tak chung law, vanram tu ah lawm tein kan i tong tthan te lai. Ka nu aww kan dawt tuk.
