Chin Miphun Ralkap (CNF) cu an zungpi Victoria Sakhan ah uknak firtu Myanmar ralkap nih a ton hna i “CDM a lutmi palek kan pe” tiin a hal.
CNF nih, “CDM a lutmi palek cu CNF sakhan ah an um lo, India ram ah an zaam,” tiah a al.
Nizaan March 10 zaanlei 4pm ah Ralkap le CNF an i ton lio ah CNF nih, “Ralkap cozah nih nan tlaihmi pawl hi kan thlahpiak hna uh, buai lo tein sandahpiahtu mipi hi hnahnawhnak pe hna hlah uh,” tiin a hal ve.
CNF biachimtu Salai Htat Ni nih, “Zahan kha CDM a lutmi palek kawl kan duh hna tiin CNF zungpi Victoria Sakhan ah ralkap an ra. Tu hnu cu ra ti hlah uh tiin ralrin kan pek hna,” tiah a chim.
“Nizaan cu voi dang an rat tawn bantukin an ra. CDM a lutmi kahin an um ti kan theih, kan pe uh a kan ti.
“Kan in pe kho hna lo, a um zong an um lo. Mah bantuk zong kan cohlang hna lo, tiin kan leh hna. Mah hnu ah an kir nain an kir thai rih lo. Kan hmunhma (Tlanglo khua) ah an um rih. Nan sakhan kan ra ṭhan lai an ti nain ra ti hlah uh tiin ralrin kan pek hna,” ati.
Chin Miphun Ralkap le Myanmar Ralkap cu Kahngol Lungtlinnak Sachoh ah minsen a thumi an si nain Myanmar Ralkap nih thawngthanh hmasa loin an sakhan ah an rak kal hnawh bal hna.
Myanmar ralkap nih uknak a fir thok in tutan hi avoi 1nak bik CNF sakhan ah an kal asi.
Ref: Khonumthung
