Chin Miphun Ralkap (CNF/A) zunglubik Camp Victoria sakhan ah US media CNN an phan. CNF Vice Chairman Dr. Suikhar nih thil sining fiang taktak in a chimh hna.
“Camp Victoria sakhan ah minung 3,000 raltuk tinṭan kan pek cang hna tiah CNF nih a chim,” tiin CNN nih a chim. A tang video minute 2:56 zawn ah zoh khawh asi.
Dr Suikhar nih, “Camp Victoria ah tinṭan kai vemi CDF hi NUG cozah nih a hruaimi hna an si [hmet law CNN tialmi ah rel khawh asi]. [NUG ralkap dihlak] 15,000 hrawng an si cang. NUG nih hriamnam pek aa zuam cuahmah ve hna,” tiah a chim. Acung video minute 1:30 zawnn ah zoh khawh asi.
Fianternak: Dr Suikhar nih NUG ralkap 15,000 hrawng an si cang a timi kha mi cheukhat nih “CNF nih minung 15,000 raltuk tinṭan a pek cang hna” an timi asi.
COVID-19 pulrai ruangah raltuk tinṭan pek kan ngol chung rih lai, tiah CNF/A hruaitu pawl nih an ti nain mino tampi tinṭan kai dingin an an hung phan peng i ngol khawh asi lo.
Tampi cu Camp Victoria sakhan pawng khuate pawl in an ra hna. Cheukhat cu lam hlapi in an ra hna. Atu hi Camp Victoria sakhan ah minung 200 hrawng raltuk tinṭan an kai cuahmah rih liopi asi.
Dr. Suikhar nih, “Atu lawlawse cu khuapi ah a caancaan tete i kah lawng si rih, nain thla thlawmpal hnu ahcun ramchung ralpi taktak a tho lai,” tiah CNN sinah a chim.
“Dr. Suikhar nih a chimmi hi ruah tikah, Myanmar ah ramchung ral saupi a tho lai i teitu zong um loin an ram a rawk thai te kho men,” tiah CNN nih a ṭial.
