Chin Miphun Ralkap (Chin National Front – CNF) nih, “Kan sinah raltuk tinṭan a kaimi vialte cu a rauh hlan ah automatic meithal AK-47 pawl kan pek dih hna lai,” tiah CNN sinah a chim.
CNN nih, “An meithal pawl cu thing le plastic in sermi va kahnak meithal an si hna (Lai meithal, puahceh le mahtein ser chommi meithal),” ati.
Nain, CNF Chairman Dr Suikhar nih, “Mah ralkap pawl hi (CNF sinah raltuk tinṭan a kaimi CDF le adang vialte) a rauh hlan ah automatic meithal AK-47 pawl kan pek hna lai,” ati.
“A thlithup in ramkip ah meithal a zuarmi an um…. Meithal cu khuazei paoh in ngah khawh asi ko.
“Mipi nih tangka an kan hlut, fund an kan kawlpiak. Cucaah tangka kong ahcun phan awk um lai ti ka ruat lo,” ati.
US, Australia, tbk ram thumnak phan Chinmi pawl nih CNF/CDF caah dollar 1 million leng an thawh cang. Hmasa an thawhmi pawl atanglei link ah rel khawh an si. An ram cozah nih a tlaih sual hna lai ti kan phan caah hnu an thawhmi kong cu kan ṭial ti lo.
- Australia Chinmi nih CNA caah dollar ting 7 leng an pek cang
- US: Dallas um Chinmi nih CNF/A caah $45,000 (Kawlram ting 600) leng an hlut
- US: ECBC Khrihfabu le member nih CNF/A caah tangka ting thong 1 leng an thawh cang
- US um Vanzang khuami nih CNF/A caah $175,000 (Kawlram ting thong 2 le cheu) an hlut
- US, Louisiana Chinmi nih CNF/A caah $54,800 (Kawlram ting 800 deng) an hlut
Chinland Defense Force (CDF) cu CNF he aa khatmi an si
CDF cu CNF nih Camp Victoria sakhan ah raltuk tinṭan a pekmi si. Aa khatmi an si ti khawh asi.
CNF Vice Chairman Dr Suikhar nih, “Camp Victoria sakhan ah tinṭan kan pekmi Chinland Defense Force (CDF) hi NUG cozah nih a hruaimi asi,” tiah a chim.
Ramtang um CNF sakhan ah ni 45 chung tinṭan an kai. An i lim hnu ah khua ah an kir i CDF min in ral an do.
University of Yangon in degree a lami CDF ralkap pakhat nih, “Khua chungah raldo dingin ralkap 10 ka hruai hna,” tiah CNN sinah a chim ve.
“Minung 10 ka hruai hna nain atu cu 7 lawng an taang. 3 cu kan hnu zarh ah Kawl Ralkap lam ah bomb tonh an timh lio ah an kut ah a puah hna i a hmun ah an thi dih.
“CDF lutlai pawl nih Camp Victoria ah vai din chung rih an ka ti caah atu hika ah ka hung kir ṭhan. Ni tlawmpal hnu ah uniform thar a nakmi kai hruk lai i tinṭan sang deuh ka kai lai,” ati.
University of Yangon ah history major in a kaimi ngol in CNF sakhan Camp Victoria ah raltuk tinṭan a kaimi John Ling, kum 22 cu raltuk tinṭan kaimi 150 hrawng ṭhihruaitu asi.
“[Kawl Ralkap nih] an ka thah lai ti na ṭih lo maw?” tiah CNN nih a hal. “Ṭih hlah, aruang cu ka ram caah pei ka dir cu,” tiah a leh.
“Ka nulepa zong keimah kongah an lungrethei lo. Kan ram caah ka dir caah an i lunghmuih tuk,” ati.
CNF nih hriamtlai phu 16 kan i bawm lai, ati
CNF nih, “Kanmah telh in miphun hriamtlai phu 16 kan um hna. Democracy le federal ngahnak caah kan dihlak ral a simi Kawl Ralkap do dingin kan i bawm te hna lai,” ati.
Kan ṭialmi hi video chungah aa tel lomi, CNN nih anmah website ah ca in an ṭialmi chung ta zong an um. Atang ah video zoh khawh asi i mahka hin CNN ṭialmi zong rel khawh asi.
