“Malaysia khualipi Kuala Lumpur cu mipi 80% raikhamsi an i chunh cangka in rianṭuan le zatlang cawlcanghnak on deuh dingin cozah meeting ah biatung ka dirh lai,” tiah Kuala Lumpur bawi Pu Annuar Musa nih a chim.
Pu Annuar Musa cu ‘Malaysia Rampumpi Cozah Ukmi Pengkulh Vuanci (Federal Territories Minister)’ asi. Rampumpi Cozah Ukmi Pengkulh 3; Kuala Lumpur, Labuan le Putrajaya uktu vuanci asi.
“Atutiang ahhin Kuala Lumpur mipi 1,302,525 (kumtling 73.4%) raikhamsi an i chun cang.
“Raikhamsi aa chunmi 80% an tlin cangka in COVID-19 zulhphung SOP felfai tein zulh buin rianṭuan le zatlang cawlcanghnak on deuh dingin rampumpi cozah ka hal lai,” ati.
Nizaan tiang ahcun Kuala Lumpur cu Malaysia ah state le pengkulh level in raikhamsi aa chunmi an tambiknak asi. A changtu Sarawak state 45.6% le Putrajaya 45.9% an si.
Raikhamsi aa chunmi an tlawmbiknak state cu Sabah 10.1%, Kelantan 12.9% le Kedah 13.3% an si.
