Rampumpi Hluttaw Aiawhtu Kawmiṭi (Committee Representing Pyidaungsu Hluttaw – CRPH) nih vuanci ah a thimmi Dr. Zaw Wai Soe nih, “cozah rianṭuan vialte hohmanh zungkai loin CDM tuah cio uh,” tiin a forhfial hna.
Aa tinhmi cu cozah rianṭuan vialte hi hohmanh zung an kai lo ahcun ralkap nih rian a ṭuan kho lai lo, ram a hruai kho lai lo, ralkap cozah a thader lai, ti khi si.
CRPH nih Rian, Fimcawnnak, Ngandamnak, Lahwahkah le Milu Vuanci caah a thimmi university cachim (professor) Dr. Zaw Wai Soe nih, “CDM a tuah lomi cozah rianṭuan pawl cu a theipar nan zunte lai,” tiah ralrin a pek hna.
“CDM a tuah rih lomi cozah rianṭuan vialte hna, zaangfahnak tein a tlaibik March 7 hlan ah CDM tuah cio uh tiah kaan nawl hna.
“CDM a tuah lomi cozah rianṭuan pawl cu a caan phak tikah mipi thimmi cozah nih ‘mipi zawn a ruat lomi na si’ kan in ti te hna lai,” ati.
Phun dangin chim ahcun, CDM a tuah lomi cozah rianṭuan pawl cu mipi zawn a ruat lomi nan si tiin rian kan in phuahte hna lai ati duhnak si.
Atu lio cu, ‘Rampi Ruahnak Petu Pi Aung San Suu Kyi, President U Win Myint le hruaitu dang pawl thlah hna uh’ tiin Myanmar mipi nih rampumpi ah thih ngamh in sandah an piah cuahmah liopi asi. Minung 1,700 leng ralkap nih an tlaih cang hna. Meithal in an kah hna i minung 54 leng an thah hna, a zaza an hliam hna.
Palek le cozah rianṭuan tampi zong nih “ralkap uknak tangah rianṭuan (ralkap caah rianṭuan) kan duh lo,” tiin zungkai loin CDM an tuah ve.
Sinain, zung bawi tampi cu an lahkhah tam pinah nawlngeihnak sungh an duh lo caah nihin tiang CDM an tuah duh lo. Ralkap caah (kuttang ah) rian an ṭuan peng ko.
