Rampumpi Hluttaw Aiawhtu Kawmiṭi (CRPH) nih tuni ah Rammi Lungrualnak Cozah (National Unity Government) a dirh i Chinmi 2 a telh ve hna.
CRPH cu 2020 November 8 thimnak ah teinak a hmumi MP (NLD) pawl an si. Thimnak ah NLD nih MP ṭhutden 85% a ngah i amah lawngin cozah tlai kho ding asi. Cozah tlai dingin February 1 ah Hluttaw meeting tuah an timh lio ah, khuadei hlan ah ralkap nih a tlaih dih hna i uknak a chuh hna. A zaam khomi NLD MP pawl nih an i thuhnak hmun cio in online in CRPH cu an dirhmi asi.
Rammi Lungrualnak Cozah nih atutiang ah Vuanci Zung 11 a ser i 2 cu Chinmi nih an tlaih.
Sweden ram ah a ummi Chin Miphun Ralkap (CNF) Vice Chairman Dr. Lian Hmung Sakhong cu Federal Ram Vuanci (Union Minister of Federal Union Affairs) rian an pek.
![](https://thechinexpress.com/wp-content/uploads/2021/04/172978889_153390093453637_7183298453064123019_n-792x1024.jpg)
Dr. Sasa cu Ramdang he Rianṭuanṭinak Vuanci (Union Minister of International Cooperation) rian an pek.
Ralkap nih a tlaihmi President Win Myint le Rampi Ruahnak Petu Pi Aung San Suu Kyi cu anmah ning tein hmunhma an pek hna.
Nain, Vice President Henry Van Thio cu an telh ti lo. Amah zaka ah Kachin mi Duwa Lashi La an thim. Sihni asi pinah Caankarlak Kachin State Cozah President zong asi.
![](https://thechinexpress.com/wp-content/uploads/2021/04/174188755_153390256786954_578480875727727917_n-792x1024.jpg)
President Win Myint cu ralkap nih an tlaih caah Vice President nih hin caankarlak President rian a ṭuan chung lai.
Mah pinah, Prime Minister hmunhma zong an ser i Karen miphun Pu Mahn Win Khaing Than an thim.