Uknak firtu ralkap cozah thlaknak caah le mipi thimmi cozah sinah uknak kirter i federal ram dirhnak caah, CRPH nih tuni April 16 ah Rammi Lungrualnak Cozah (National Unity Government) a dirh.
CRPH (Rampumpi Hluttaw Aiawhtu Kawmiṭi) cu ralkap nih February 1 ah phungninglo in uknak a fir hnu ah, 2020 November 8 thimnak ah teinak a hmumi MP pawl nih ralkap thlaknak caah an dirhmi asi. CRPH cu ramchung ramleng mipi nih an ṭanpi cio.
Cozah thar cu, tlangcung um miphun pawl telh in Myanmar ram democracy ngahnak caah aa zuammi tampi fonh in dirhmi asi. March thla ah CRPH nih a rak thanhmi Federal Democracy Phungphai (Federal Democracy Charter) hmangin an dirh. Mah charter nih cun tlangcung miphun pawl nih an hal pengmi ‘federal ram (mahle state cio mah tein i uk ding)’ timi kha ngahter hrimhrim dingin aa tinh.
Cozah thar hruaitu pawl konglam
Rammi Lungrualnak Cozah hruaitu, Rampumpi vuanci vialte hruaitu Rampumpi Vuancichoh (Prime Minister) cu Karen miphun Pu Mahn Win Khaing Than asi. NLD acozah lio ahkhan Hluttaw Niam (Pyithu Hluttaw) hruaitu asi.
Prime Minister (Rampumpi Vuancichoh) cungah President a um. President cu ralkap nih an tlaihmi U Win Myint kha asi rih ko. Ralkap nih an tlaihmi Pi Aung Sang Suu Kyi zong amah reng hlun Rampi Ruahnak Petu an pek.
Vice President cu Kachin miphun Pu Duwa Lashi La asi. Kachin National Consultative Assembly i President zong asi.
President Pu Win Myint ralkap nih an tlaih caah Vice President Duwa Lashi La nih hin caankarlak president a ṭuan lai, president nawlngeihnak vialte a tlaih hman dih lai.
Lawlawse cu, Vice President le Prime Minister nih Rammi Lungrualnak Cozah cu an hruai lai. Atutiang ah Vuanci Zung 11 an thanh cang i 2 cu Chinmi nih an tlaih. Kachin le Karen zong nih an tlaih ve. Rakhine, Shan, tbk miphun dang nih an tlaihmi um rih lo. A biapi tukmi Lamsul, Cinthlaknak le Sehtha/Energy Vuanci an thanh rih lo caah mah lei hi an tlaihter ve te men hna lai.
MP a ngahmi NLD party member 4;
- Daw Zin Mar Aung = Ramdang Vuanci
- U Lwin Ko Latt = Ramchung le Lahwahkah Vuanci
- U Yee Mon = Runvennak/Ralkap Vuanci le
- U Tin Tun Naing = Tangka, Simanking le Sipuaizi Vuanci an tlaihter ve hna.
5. CRPH nih Myanmar UN Special Palai ah a rak thimmi Chin miphun Dr. Sasa cu Ramdang he Rianṭuanṭinak Vuanci rian an pek. Rammi Lungrualnak Cozah (National Unity Government – NUG) aiawh biachimtu zong asi chih lai.
6. Chinmi ṭhiamṭhiam Dr. Lian Hmung Sakhong cu Federal Ram Vuanci rian an pek. Chin Miphun Ralkap (CNF) Vice Chairman asi. Liamcia NLD acozah dirhmi Ram Daih Biaruahnak Kawmiṭi (UPDJC) member zong asi.
7. Ruh sibawi Dr. Zaw Wai Soe cu Fimcawnnak/Sianginn le Ngandamnak Vuanci rian an pek. Uknak an fir hlan ah Yangon ramṭhen COVID-19 karh khamnak simanking a suaimi ruangah le CDM a luh ruangah a minthang ngaimi si.
8. Ralkap nih uknak an fir hlan tiang NLD acozah tangah Zatlang Zohkhenhnak le Ṭhialkamnak Vuanci a rak simi Dr. Win Myat Aye cu Hartang Bawmhnak le Kokek Ral Vennak Vuanci asi lai.
9. Social Science le Community Ṭhanchonak major in master degree a ngahmi Kachin miphun Dr. Tu Hkawng cu Kokek Thilchuak le Pawngkam Zohkhenhnak Vuanci asi lai.
10. Naite thimnak ah MP a ngahmi NLD party member Naw Susanna Hla Hla Soe cu Nu, Mino le Ngakchia Vuanci asi lai. Karen miphun asi.
Vuanci 11 an thanh cang nain Dr. Zaw Wai Zoe nih vuanci 2; Ngandamnak le Fimcawnnak a tlaih caah number 10 tiang lawng a piahnak si.
Rammi Lungrualnak Cozah (NUG) nih vuanci changtu (deputy minister) 12 a thim cang hna. Vuanci 11 lawng a thim hna nain a changtu 12 an sinak aruang cu Federal Ram Vuanci Dr. Lian Hmung Sakhong changtu minung 2 an um caah si.
Vuanci changtu 12 chungah 6 cu tlangcung miphun; Kachin, Karen, Mon, Kayin (Karen), Kayah le Ta’ang an si. Tam deuh cu ramkhel ah a cawlcang ngaimi catang ngei mino an si hna.
NUG an dirhmi cu ramchung ramleng Kawlrammi vialte nih lunglawm ngai in an cohlan cio.
CRPH nih NUG kan dirh tiin an Facebook page ah thawng a thanhmi cu minung ting 3 le cheu deng nih an i share manh cang.
Minung pakhat nih, “Kan cozah taktak le NUG kan in dirkamh hna,” tiah comment a ṭial. Midang zong nih cu bantukin an comment cio.
Ramdang Vuanci Daw Zin Mar Aung nih tuni ah, “Myanmar mipi nih an luatnak caah ṭihnungmi thil tuah le man fakpi pek zong an ngamh. Ramdang nih ramkhel in siseh, tangka le runvennak zong in kan bawm uh,” tiah US media tumtlang The New York Times ah a ṭial.
