Rampumpi Hluttaw Aiawhtu Kawmiṭi (CRPH) nih, “2008 Phunghram cu kan hrawhthah cang, a thi cang,” tiah thawng a thanh.
Dr. Sasa nih, “2008 Phunghram cu a thi cang, hman khawh si ti lo,” ati.
“Michiahru ralkap bawi pawl nih an rak sermi 2008 Phunghram cu kan hrawhthah cang, tiah Myanmar mipi nih an thimmi MP pawl nih an thanh. Hika hin ni thar aa thok cang!,” ati.
CRPH cu 2020 November 8 thimnak ah mipi nih an thimmi MP pawl nih an dirhmi si. Uknak firtu ralkap cozah nih cun “CRPH cu phungninglo bu asi, ram rawitu an si i fak piin dantat an si lai” tiin a thanh. CRPH dirhtu pawl cu ralkap nih a kan tlaih lai ti an phan caah an i thup hna. An i thuhnak hmun in ralkap an do.
CRPH nih 2008 Phunghram a thahnak aruang cu:
1. Democracy, tlukruannak le mahte khuakhan lairelnak tling tein a ngahmi Federal Democracy Ram dirh kan duh
2. 2008 Phunghram cu hremuktu ralkap nih uknak an tlaih khawh pengnak ding caah an sermi si pinah Federal Democracy Ram dirhnak caah dawntu asi
3. Ralhrang ralkap nih 2021 February 1 ah 2008 Phunghram buar in uknak an fir caah mah phunghram hi an buar hrawh cang
4. Ralkap hremuknak hrawh, 2008 Phunghram hrawh, federal democracy ram dirh le mipi thimmi cozah chuahter dingin democracy duhtu hna he kan ser i fehtermi Federal Democracy Phungphram zong a um cang
5. Cucaah, 2008 Phunghram cu CRPH nih March 31 ah kan hrawh thah, ati.
