Indonesia palek nih,”Thawhtthanni a phak hlan ah ralhrang cawlcanghnak voi 2 tiang a can caah biakinn pawl ah security chah deuh in kan chiah lai,” tiah April 1 ah thawng a thanh.
Zarhpini ahkhan Makassar khua ah a ummi RC biakinn pakhat ah aa tthiumka nuva nih nunthap in bomb an puah.
“Nuva hna cu an i umhnak thla 6 fai lawng a si rih. Online in bomb ser ning an cawng,” tiah palek bawi Argo Yuwono nih a chim.
Nuva hna cu Zarhpini zingka ah motorcycle in RC biakinn ah an ra. Nunthap in bomb an puah nain anmah pahnih lawng an thi. Minung 20 hrawng hliam an tong.
Palek nih bomh puah kongah aa pehtlaimi minung 4 an tlaih hna.
Cun, Nithumni ah nu pakhat nih Jakarta khuapi ah a ummi Palek sakhan a luhhnawh i palek pawl meithal in a kah hna.
Meithal kuan voi 6 hrawng a puah hnu ah palek nih thi lakin an kah. Palek aa hliammi an um lo.
April 4 khi Thawh Tthan Ni a si bang Khrihfa pawl cu biakinn ah pumh an kal hna lai.
Ralhrang nih bomb puah le meithal kah a cannak hnga lo Khrihfa biakinn pawl cu palek nih biatak tein ven an timh.
“Poipang a cannak hnga lo Khrihfa biakinn pawl ah bomb kawlnak kan tuah lai. Biakinn kutka luhnak ah palek nih kan cawngh lai i a lut/chuakmi thilri check an si lai,” tiah Indonesia palek an ti. – CNA
