- Ralkap nih mipi an thahnawn hna ning a fah chin lengmang caah ramdang nih fak deuh in sipuaizi an phih herh
- China le Russia nih hriamnam zuarh ngol hna seh
Dr. Sasa cu US media tumtlang bik asi vemi CNBC nih bia a hal.
“Ramdang nih Myanmar ralkap hi sipuaizi lei in siseh, ramkhel lei zongin a rannak in dantatnak an tuah herh,” tiah a chim.
“Mah pinah, Myanmar ralkap nih mipi that ti hna hlah tiin UN Security Council nih fak deuh in ralrin a pek herh,” ati.
Ramdang hi ‘ningzak’ an si
“China le Russia nih Myanmar ralkap sinah hriamnam zuar hi ngol hna seh.
“Ralkap nih ni fatin, second fatin, Myanmar mipi nuai 54 tuksapur lungrethei in an chiah hna.
“China le Russia cu ramṭhawng an si. Myanmar ralkap hi mipi thah an ngolter khawh. Anmah biakhiah lawng a taang.
“Mipi thah an ngolter lo ahcun, ramdang le UN Security Council hi ningzak an si. An ningzak seh,” ati.
China, Russia, India le Vietnam nih UN Security Council cu “Myanmar ralkap nih uknak a firmi mawhchiat le fak deuh in hma lak an kham”. Mah ram 4 hi ralhrang ralkap lei an ṭang.
Dr. Sasa nih, “Tuanbia nih fakpiin bia a kan ceihte lai, al awk um lo. Bia an chah hrim hau. Bia an chahmi theipar an zun lai,” ati.
Sipuaizi phih
“Ralkap nih kuan le hriamnam cawknak caah rammi company tangka a hman. Ramdang nih sipuaizi an phih dih ahcun tangka a tlawm deuh lai, hriamnam a tlawm deuh lai i mipi thah a tlawm deuh lai.
“A ra laimi ni tlawmpal ah Rammi Lungrualnak Cozah (Caankarlak Cozah) kan dirh lai i democracy le luatnak kan ngah ṭhan hlan lo, din loin rian kan ṭuan peng lai.
“Ramdang he biatak tein rian kan ṭuanṭi lai. A kan ṭanpitu vawlei cung ramkip he le hawikom hna he rian kan ṭuanṭi lai. Democracy kan ngah tik cun ralkap bawi pawl cu umnak an ngei ti lai lo,” ati.
