NUG cozah biachimtu Dr Sasa nih, “Dawtmi dothlenṭi hawi hna, tuni France Hluttaw Sang i Ramdang, Runvennak le Ralkap Committee sin in thawngpang ṭha kan ngahmi pawl hrawmh kaan duh hna. Hawikom vialte nih thlacamnak in nan ka bawmh caah nan dihlak cungah ka lawm,” ati.
“France cozah nih NUG hi Myanmar cozah dik asi tiin cohlan dingin France Hluttaw Sang MP 150 leng nih min an kan thut piak cang. France Hluttaw Sang MP dihlak (348) nih minthut dingin a rauh hlan ah vote thlak biachahnak an tuah lai.
“Hramhram uktu ralkap nih Myanmar mipi nuai 54 cungah a tuahsermi ṭhalo vialte hi donghter dingin France cozah nih fak piin dantatnak tuah ding zongin France MP pawl nih an cozah an forhfial.
![](https://thechinexpress.com/wp-content/uploads/2021/07/206122256_344319033825627_6850249247324815545_n.png)
“Mah hihi France Hluttaw Sang MP dihlak nih lungrual tein an pom cio nak hnga, nan dihlak in thlacamnak in kan bawm cio uh tiah kaan nawl hna. Hluttaw Sang MP dihlak nih lungrual tein an pom lai ti ruahchannak he thla ka cam ve.
“Aruang cu, mah biachahnak hna hi Myanmar rammi vialte hramhram ralkap uknak chungin kan luat i a zalongmi federal democracy ram kan dirh khawhnak dingah a biapi tukmi kawltung asi.
“Zaangfah tein thlacam ṭi hna usih law kutsih in ṭuanrel ṭi peng hna usih. Mah lawngah daihnak, tlukruannak le rualremnak caah a nunnak thapmi Myanmar rammi nuai 54 caah France cozah nih an kan tuahpiakmi hi a zalongmi democracy ramdang pawl zong nih an kan tuahpiak ve lai.
“Kan dihlak in kan tei thluahmah ko hih. Myanmar um hramhram uktu pawl an sung thluahmah cang.”
![](https://thechinexpress.com/wp-content/uploads/2021/07/206628649_344319563825574_3784785353121292147_n-1024x600.jpg)
Upatnak he,
Dr Sasa
Ramdang he Rianṭuanṭinak Vuanci – NUG