Uknak firtu ralkap Thawngthanhnak Vuanci Zung nih nizaan ah, “Uknak chuttu”, “uknak chuttu ralkap” siloah “ralkap phu” kan ti hlah uh, tiin ramdang media ralrin a pek hna.
Ralkap nih February 1 ah mipi thimmi cozah uknak an chuh i a thaizing ah Ram Uktu Phu (State Administrative Council – SAC) an dirh, i ralkap bawizik Min Aung Hlaing nih a hruai hna.
Ramdang media ralrin peknak cu Thawngthanhnak Vuanci Zung nih cozah tadinca Global New Light of Myanmar ah a chuah i, “SAC nih hin 2008 Phunghram i poipang dirhmun upadi ning tein ram rian a tlaihmi si, SAC hi uknak chuttu cozah asi lo,” ati.
“Myanmar um ramdang media thawngla cheukhat nih charhchan le tatte um loin Myanmar kong an porh i thawngpang diklo an thanh lengmang.
“Ramdang media pawl nih biafang hman nan i palh rih ahcun asiloah tatte um loin bia nan porh i thawngpang diklo nan thanh rih ahcun nan cungah hma kan lak lai,” ati.
Ramchung media pawl cu February thla te khan ‘uknak chuttu’ timi biafang hmang hlah uh tiin ralkap nih ralrin a pek lengmang cang hna. Nain tutan cu ramdang media a ngiar hna.
Mah biafang pawl hmang lo dingin ramdang media a ngiarmi hna ruah tikah, ramdang cozah hmai ah mifir bantukin aa puhrung i a mithmai bi tuk cang, tuah awk a hngal ti lo ti a lang.
