Rammi Lungrualnak Cozah (NUG) biachimtu Dr. Sasa nih uknak firtu le rammi that tu ralkap bawizik Min Aung Hlaing cu “lainawng lutlai” tiin a auh.
“Lainawng lutlai Min Aung Hlaing cu ASEAN meeting ah an sawm awk si lo. An meeting mualpho tertu asi lai pinah, ASEAN ram pawl nih Myanmar mipi an kan nehsawh zong asi lai.
“Min Aung Hlaing ralkap pawl nih an thahmi miralṭha 714 chungkhar hna caah lungfah chinchinnak petu zong asi lai,” ati.
Hmai zarh Zarhteni, April 24 khi ASEAN chungtel ram pawl nih Myanmar kong meeting tuah an timh, nain ani balte hi cu ASEAN chairman Brunei nih a fehter rih lo. Mah meeting ahcun ralhrang bawizik Min Aung Hlaing kaiter an timh. Mah cu Dr. Sasa nih a chimmi si.
Asia Nichuah Thlanglei Ram Pawl Funtomnak Bu (ASEAN) cu ram 10;
- Myanmar
- Malaysia
- Thailand
- Indonesia
- Vietnam
- Singapore
- Philippines
- Cambodia
- Brunei le
- Laos nih dirhmi asi.
UN Security Council zong ralhrang Myanmar ralkap cungah hma la kho loin China le Russia nih an kham peng.
ASEAN ram 9 zong cu democracy ram (Indonesia, Malaysia, Singapore le Philippines) nih cun ralhrang Myanmar ralkap cozah tlerh le rengh an duh ko nain, hremuknak a hmangmi ram (Thailand, Vietnam, Cambodia le Laos) nih ‘ASEAN phungphai ah pei mi ram chung buainak ah i thlak lo ding’ ti asi kha an ti i Myanmar mipi bawmh an duh lo. Mah ruangah atutiang ASEAN nih zeihmanh a tuah kho ve lo.
Dr. Sasa nih acunglei bangin a ṭialmi ahcun, “ASEAN, atu cu Myanmar mipi nih cozah NUG kan ngeih cang. Ralhrang Min Aung Hlaing sawm loin Rammi Lungrualnak Cozah (NUG) tu hi nan sawm awk asi,” tiah an comment.
“ASEAN ram hruaitu pawl nih Myanmar mipi kan hnulei in namte in an kan sawh. ASEAN in kan chuah awk si” tiin lungfah comment a ṭialmi zong an um.
