Caankarlak cozah NUG i Federal Ram Vuanci Dr. Lian Hmung Sakhong nih, “Min Aung Hlaing nih uknak a firmi hi a duh lomi ralbawi tampi an um, CDM tuahnak in mipi cozah NUG hi kan bawm ve uh,” tiah a sawm hna.
Dr. Sakhong nih kahngol biaruahnak (NCA) tuah lio ah a theihhngalhmi ralbawi pawl atu bantukin CDM tuah dingin a sawm hna hi si.
“Kanmah he aa naihniammi kan hawikom ralkap bawi pawl zong nih Min Aung Hlaing nih atu bantukin uknak a firmi hi an duh hrimhrim lo,” tiah a chim.
Dr. Sakhong cu NCA biaruahnak tuah lio ah biapi in ralkap bawi pawl he aa tong chawnbia lengmangmi asi.
“Ralkap hruaitu bawi pawl, rammi mipi dihlak he i bawm in CDM tuah ve uh. Min Aung Hlaing hnu lawng zul hlah uh.
“Thil dik hnu zul uh. Zumh awktlak sinak i thim uh. Mipi zawn a ruatmi cozah dirh kan bawm uh,” tiah Dr. Sakhong nih a sawm hna.
Chin Miphun Ralkap (CNF) Vice Chairman Dr. Sakhong cu April 16 ah dirhmi caankarlak Rammi Lungrualnak Cozah (National Unity Government – NUG) nih Federal Ram Vuanci rian a pek.
