India ram, Manipur state khualipi Imphal ah Citizens Committee Manipur (CCM) nih “Atu lio Myanmar boruak: Manipur nih bawmhnak kong” timi tlangtar in meeting a tuah i “Myanmar ralzaam pawl cu kan bawmh rih ko hna lai” tiah bia a khiah.
Manipur state Moreh khua cu Kalay, Tamu he aa rimi si caah Myanmar rammi, ahlei in Chinmi tampi Manipur ah an zaam.
Meeting a kaimi pawl nih atu lio Myanmar mipi tuarnak kongah an ngaihchiatnak kong an chim cio hnu ah Myanmar ramri um Manipur state khuate ah a hung zaammi pawl cu kan bawmh rih ko hna lai, tiin bia an khiah hi si.
Myanmar ralzaam pawl bawmhnak caah Manipur mipi sinah tangka bawmhnak kan halpiak hna lai, an ti.
![](https://thechinexpress.com/wp-content/uploads/2021/04/Manipur-a-zammi-Myanmar-refugee.jpg)
Manipur mipi le Myanmar mipi cu hlan lio tein aa dawmi le aa rak bawmmi kan sinak kong zong meeting a kaimi pawl nih an chim.
“Myanmar mipi harnak fak chinchin an ton caah kan ngaihchia tuk, cucaah Manipur ah a hung zaammi pawl cu bawmh hna dingin meeting a kaimi vialte kan lungtling dih. Bawmtu committee kan dirh i Professor Amar Yumnam nih a hruai lai,” tiah meeting dih hnu ah cathanh an chuah.
![](https://thechinexpress.com/wp-content/uploads/2021/04/CCM-Chairman-Pu-Radhabinod-Koijam-Manipur-Vuancichoh-hlun.jpeg)
An ram hremnak ruangah a zaammi Myanmar ralzaam pawl cu kan minung hawi zawruahnak te he bawmh hna dingin India cozah hruaitu Prime Minister zong kan chimh lai, tiah meeting ah an khiah fawn.
Cun, Myanmar ralzaam bawmhnak tangka donnak caah CCM Facebook page kan ser lai i Imphal Human Rights Alert bank account kan hman lai, ti zongin bia an khiah.
Myanmar ralzaam bawmhnak a hramthoknak caah CCM Chairman Pu Radhabinod Koijam (Manipur Vuancichoh hlun) nih Rs 50,000 (Kawlram ting 9) a hlut.