Hakha dawrthar sang ah a ummi Pu Ci Ling, kum 66 cu February 4 zaan ah ralkap uknak duhlo langhter in umkheng a tum caah palek nih an tlaih tiah kan theih.
Hakha mino pawl nih palek sakhan ah an tlaihnak a ruang an va hal i pawngkam hnahnawhnak a pek caah kan tlaihmi a si an rak ti hna.
Ralkap uknak duh lo langhter can ah umkheng a tummi dang tampi zong an um ve ko nain innchung ah an tlik dih manh caah an tlai kho hna lo.
Pu Ci Ling cu thaizing ah biaceihzung ah tangka Kyats 50 dan an tat hnu ah thlah a si te lai.
Pu Ci Ling hi tutan ralkap uknak duhlo langhternak he pehtlai in Laitlang chungah palek nih tlaih hmasabik mi a si tiah kan theih.
Thantlang zong ah ralkap duh lo langhter can ah umkheng a tummi mino pawl cu palek nih bia an hal len hna.
February 1,2021 ah ralkap nih uknak hramhram in a lak i rammi tampi nih an duh lo caah mah innchung cio in zaan sml 8:00pm paoh ah umkheng tum cio a si.
Chin state chung khua tampi zong ah ngakchia in tar tiang nih lungtho takin umkheng cu an tum cio hna.
Photo; Chin World
