Naite January 10 ah tuahmi ‘New Face Model International 2021’ dawh zuamnak Hakha aiawh in aa zuammi Nyein Myat Thu cu winner laksawng an chuh tthan.
Caan tlaitu nih thawngthanh aa palh ruangah atu bantuk in thil a can hi a si.
Puai a tuahtu Sai Ko Ko nih, “Caan tlaitu nih aa palh mi a si. Nyein Myat Thu cu top 5 thim hlan ah Special Award Title pakhat pek kan timhmi a si.
“Caan tlaitu nih thawng a thanh lio ah Hakha khua aiawhmi tiin a chim. Catlap ah Nyein Myat Thu pek dingmi laksawng le Hakha khua aiawh in aa zuammi model pek dingmi laksawng tikha aa zul in aa ttial caah caan tlaitu nih Nyein Myat Thu ah a ruah i a thanhmi a si.
“Winner taktak cu Nadi Moe a si. Nyein Myat Thu cu Top 5 zong ah aa tel lo. Nyein Myat Thu pek kan timhmi cu lungthin dawh he aa pehtlaimi laksawng a si,” tiah hrinhfiahnak a tuah.
Amah Nyein Myat Thu zong nih, “Zapi sinah thawngpang fiang thanh kan duh hna. New Face Model International 2021 City Final Live Show ah Hakha khua aiawh in winner laksawng an ka pekmi kong a si.
“Ka ngakchiat lio tein model si ka duh zungzal. Atu puai zong hi ka chunmang ka tlinhnak hnga laksawng hmu dingin ka si khawh chungin kaa zuam.
“Stage cung ah winner laksawng kan in pekmi cu kan i palhmi a si tiin an ka chimh. A tang ah an ka thlen tthan i a thaizing ah puai tuahtu nih thawngthanhnak an tuah.
“Puai tuahtu lei nih nawl an ka timh. A ngaingai ti ahcun special laksawng hmumi ka si. Keimah tein ka um komi mipi nih nan ka mawhchiat tuk i ka lungtha lo.
“Puai tuahtu zong mawhchiat awk an si lo. A kan kip in an buaithlak tuk ve ruangah an i palh sualmi si caah ka theihthiam ko hna.
“A dang puai pawl zong ah an i palh ttheu tawn ko. Nan zapi tein kan nawl hna. Puai tuahtu saya Sai Ko Ko zong mipi nih nan mawhchiat tuk i ka lungtha hrim lo. Ka ngaithiam hram uh,” tiin a Facebook page ah a ttial.
