Tuni ah India ralkap helicopter a tla i ralkap bawizik General Bipin Rawat le a nupi telh in minung 13 an nunnak liam, tiah India Vanlawng Ralkap nih thawng a thanh.
Helicopter a tlaknak cu Tamil Nadu state ah asi.
Helicopter aa cit vemi ralkap bawi Captain Varun Singh cu a nung. Ralkap Sizung ah an thlop lio asi.
A tlami helicopter hi Russia sermi Mi-17V5 helicopter asi. Tlang cung um Vanlawng Ralkap sakhan in a kir lei ah Tamil Nadu state i Coonoor khua pawngah a tla.
Helicopter a tlaknak cu a kaang dih. Khuami nih mei an thah i miruak cu an chuah hna.
India Prime Minister Pu Narendra Modi nih, “Ralkap bawizik Rawat nih hin India ralkap hi chanthar ralkap ah tampi a ser. Ralkap thiamsang taktak asi,” tiah a ngaihchiatnak kong a chim.
India Ralkap Vuanci Rajnath Singh nih, “Rawat hi ralṭha taktak le felfai taktak in ram caah rian a ṭuan pengmi si,” tiah a ngaihchiatnak a chim ve.
A tlaknak aruang cu Vanlawng Ralkap nih hlathlainak tuah dingin nawl a chuah.
Rawat, kum 63 cu atu lio India ralkap vialte lakah a bawibikmi asi. Kawlram he tahchun ahcun Min Aung Hlaing bantuk asi (mi thah le chiat lei si loin rank in ti bia).
Kum 2015 zongah Nagaland state ah aa citmi helicopter a rak tla nain a thi lo.
Tuni a tlami Russia ser Mi-17V5 helicopter hi India ralkap nih chawhvahnak caah an hman ngaimi asi.
Kum 2017 zongah Mi-17V5 helicopter cu India ram, Arunachal Pradesh state ah a rak tla i India ralkap 7 an thi.
