Kachin state, Momauk peng ah uknak firtu Myanmar le Kachin hriamtlai phu Kachin Luatnak Ralkap (KIA) fak tukin an i kap, i nizaan zaanlei ah Alaw Bum tlang lei a hung lutmi ralkap 18 cu KIA nih an tlaih hna i KIA sakhan lubik Laiza ah kalpi an timh hna lio asi.
Mah pinah, KIA hmenhmi bomb nih a puah hna i Myanmar ralkap 30 leng an thi. KIA ralkap 2 an nunnak liam ve, tiah KIA nih a fehter.
Momauk peng, Sihak khuate zongah nizaan 8pm hrawng khan fak tukin an i kap.
KIA nih an lakmi Momauk peng ralkap sakhan cu ralkap nih miakpi in an kah lengmang caah miakpi kuan ngan pipi khua chungah an tla puak. Khuami pawl cu bomb ral i vennak vawlei khor chungah an i thup, tiah a zaammi pawl nih an chim.
April 10 thokin Bhamo-Myitkyina lam thluan ah KIA le ralkap an i kah peng caah khuami 2,000 leng nih an inn an zaam tak i Bhamo peng um Phungki/Buddhist biakinn le Khrihfa biakinn pawl ah a i dor hna.
Ralzaam pawl caah rianrang in puan, khiangthawng, umkheng le nunnak caah a herhmi thilri pawl bawmh an herh.
Nai hrawng Momauk pengah KIA le ralkap an i kah ruangah khuami a tlawmbik 5 le phungki 1 a thi cang. Kuan hma tuarmi 5 an um i khuate tampi ah miakpi kuan ngan pipi an tlak puah caah inn tampi an rawk, tiah a zaammi pawl nih an chim.
Momauk peng an i kahnak hmun hi Shan miphun deuh lawngte an umnak asi i khuate 20 hrawng a umnak si, tiah kan theih. — DVB
