KNU: Ramdang he i bawm in ralkap uknak kan hrawh lai

Karen hriamtlai phu KNU nih, “ramdang he i bawm in ralkap uknak hi kan hrawh cikcek lai,” tiah cathanh a chuah.

“Buai lo tein sandahpiahmi mipi hi ralkap cozah ukmi ralkap le palek nih hnahnawhnak an pek hna i an kah thah peng hna ahcun KNU nih kan ven hna lai.

“Myanmar ralkap cu tlangmi a kan thlanglamhtu asi i milu tlawm tlangmi hna harnak petu asi caah ramchung mipi, tlangmi le ramdang he i bawm in kan doh lai,” ati.

KNU cu ralkap nih uknak a firmi kongah fak piin duhlonak a langhtertu miphun hriamtlai phu ṭhawngṭha asi.

Ralkap uknak duhlo ruangah a zaammi Myanmar ralkap pawl zong KNU nih a cohlan hna i a sinah a humzual hna, a bawmh hna.

Atu hi Karen state ahcun ralkap duhlonak langhtertu mipi zong KNU nih meithal le miakpi he a zulh hna i a ven hna.

February 26 zongah sandahpiahmi mipi hrawhkhuai in KNU hmunhma a va phanmi Myanmar ralkap 3 (buhmu le a tapeh 2) cu KNU nih a kah thah hna.