Tuni ah Hakha khuapi ah a ni 27 nak mipi lamzawhnak an tuah i Pu Thla Hre nih a tanglei bangin forhfialnak bia a chim.
Pu Thla Hre: Upatmi, dawtmi, ttihzahmi CDM ah baa ngai in ni 27 tiang aa tel khomi nulepa, ulenau le fanu, fapa hna nan zaapi upatnak kan pek hna.
Chun ah siseh, zaan ah siseh baa cikcek in, lungrethei in nan vahmi hi a sawhsawh a si hrimhrim lai lo.
Hika CDM ah a rami mi hna le lamhlat, lamnai in CDM a bawmmi nan dihlak cungah kaa lawm tuk, upatnak kan pek hna.
A hlei in, cozah rianttuan mi hna nan cabuai, tthutden chiah tak in hika ah kan ram thlen ding le hmailei ca ruahnak thinlung he nan ratmi hi upatnak kan pek hna.
2020 November, 8 thimnak ah kaa zuam ve i mee 2,000 dengmang ka hmu. Sihmanhsehlaw, teinak ka hmu lo.
Nain, democracy phung ahcun teinak kan hmuh lo zongah cohlan ding si. Cucu politician i a dirhmun si. Cu caah, lungthiang tein ka cohlan.
Tuanbia nih hin fim a kan chimh. Tuanbia nih tthawnnak a kan pek. Tuanbia nih lai a rel. Tuanbia nih miphun kan sinak a langhter.
Kan nih cu kan upa cang. Kan fa, kan nau le nih hmailei ah ttuanvo nan lak dingmi tampi a um. Cu lioah, atu bantuk kan tonmi hi ngaihchia ngaingai a si. Cucaah, biatak tein ttan ka la hna lai.
Ralkap nih rianttuan tti dingah an ka sawm nain anmah he rianttuan tti dingah Chin miphun ka sinak, Laimi thisa ka sinak nih a zeiti hmanh in a cohlang kho lo. Cucaah, ka almi hna a si.
Kan ram hi a rauh hlan ah thlen khawh dingah nan ba ko lai, nain kan bat mi kha thazaang thar ah i lak tthan hna usih.
Teinak kan hmuh nak dingah ni khat hnu nikhat a nei chin lengmang. Cucaah, biatak tein i zuam hna usih tihi forhfial kan duh hna.
