Kum 2013 ah UNHCR card/catlap a ngahmi Asylum Seeker pawl kha UNHCR nih phone in RSD interview a tuah cuahmah hna.
Atu lio cu COVID-19 lockdown ruangah UNHCR zung kal a ngah lo caah ‘phone chungin interview’ a tuah hna hi si.
UNHCR nih a chawnh hna tik ahhin zung phone number 03 nakin pumpak phone 01 in a chawnhmi hna an tam deuh caah phone tlaih daithlan bak lo a hau.
Phone hrimhrim chawnh khawh lomi le chawnh khawh ko nain a tlai lomi an tamtuk, tiah UNHCR nih a chim.
Cucaah nan phone number nan i thlen ahcun atu nan i tlaih liomi pe colh ulaw phone tlaih daithlang hlah uh.
Na phone number nai thlen ahcun atu na tlaih liomi kha mah hi hmet law pe.
RSD interview cu zei dah si?
RSD cu Refugee Status Determination (Ralzaam Dirhmun Biachahnak) tinak asi i ralzaam ah cohlan le hlanlo biakhiahnak caah tuahmi biahalnak/interview asi.
RSD interview na awn lawngah UN card an in pek lai i na case kha ram thumnak US ti bantuk ah an in kuat piak lai.
RSD interview na awn lo ahcun ram thumnak na kal kho lai lo.
Na awn lai/lo cu RSD interview lio ah na chimmi zoh in UNHCR nih bia a chah ding si caah kanmah nih cun kan chim kho lo.
ACR Chairman James Bawi Thang Bik nih, “Lockdown hlan kha cu ACR zungin an phi tawn i a sungmi an um rih lo. Lockdown hnu hin cun anmah inn cio in an phi cang i ka hngal lo. Nain kum 2017 le 2018 lio bantukin chuh thluahmah kha cu a um ti lai lo tiin ka ruah ko,” tiah The Chin Express ah a chim.
“Sinain, na case chiat tuk ahcun hngal ve bak hlah, na sung kho ko. Nazi 3 chung bak bia an hal hna caah a tam taktak an hal hna. Atu lio Kawlram kong zong an hal hna. An i ralrin (timhtuah) ngaingai a herh,” ati.
UNHCR ah nan ap case kha philh hlah uh
Kum 2013 UNHCR luh lio ah catlap in UNHCR sinah nan rak pekmi nan case kha philh lo a biapi ngai. Cun, atu cu hlan lio kum 2009 le 2010 lio bantuk asi ti lo caah na case hi a biapi tuk.
Na rak ap mi le RSD interview tikah na chimmi kha ti le mei bantukin aa dan ahcun asi kho lo.
Na philh cang hmanh ah, a hrawnghrang tal cu i ruat kho law ṭha. Kawlram na zaamtaknak aruang kha a biapi bikmi si. Kawlram na zaamtaknak aruang kha ṭha tein na chim khawh a herh.
Cun, Kawlram kir awk na ṭhat lomi kong hi a pahnihnak a biapi bikmi asi. Kawlram dirhmun cu vawleipi theih asi. Kawlram ah kir awk na ṭhat lonak kong le hi tluk Laitlang (nan khua hrawng) ral tam lio ah kir awk na ṭhat lonak kong kha tling tein na chim khawh a herh.
Kanmah duh ahcun, atu te hin i ṭial cia dih law kan in duhpiak. Catlap ah ṭha tein nai ṭial cia dih le voi tampi na zoh lengmeng ahcun an in hal tikah fawi deuh le tluang deuh in na leh/phit khawh lai.
