Malaysia ah avoi 1nk bik COVID-19 hrik thar Omicron kan hmuh ve, tiah Ngandamnak Vuanci Pu Khairy Jamaluddin nih tuni ah a thanh.
Nizaan December 2 ahkhan Malaysia ah university kai dingin a rami kum 19 South Africa nu sinah kan hmuh. South Africa ram in Singapore ah a zuan hnu ah November 19 ah Singapore in Malaysia ram Perak state khualipi Ipoh ah a lut, ati.
“KLIA vanlawngtual a phak ah COVID-19 an test i COVID-19 hrik a ngeih caah a kainak Ipoh university pakhat nih university bus in a kalpi i quarantine a tuah,” ati.
Mah lio ahhin COVID-19 hrik a ngeih cu an hmuh ko nain Vawlei Ngandamnak Bu (WHO) nih Omicron kong thawngthanhnak a tuah rih lo caah Omicron asi an hngal lo. COVID-19 hrik ti tiang lawng an test i aci tiang an test chap ti lo.
“University nih ni 10 chung quarantine a tuah hnu November 29 ah a chuah ter.
WHO nih, “South Africa ram ah ṭihnung tukmi COVID-19 hrik thar an hmuh. COVID-19 ci voi tampi aa thleng cangmi asi i Omicron tiin min kan sak..,” tiin thawng a thanh.
Mah hnu ah South Africa nu sinah COVID-19 hrik an hmuhmi cu aci an test ṭhan i atu bantukin nizaan ah Omicron asi an hngalh hi si.
“COVID-19 hrik thar Omicron a ngeimi South Africa nu cu quarantine an tuah lio ah zawt hmelchunhnak zeihmanh a ngei lo. September 29 ah Pfizer raikhamsi voi 2nk aa chun cangmi asi.
“Amah pawng a rak ummi minung 5 – bus aa cit vemi le a mongtu cu COVID-19 kan test ve hna i quarantine kan tuah ve hna.
“Voi 2 cio kan test cang hna i zawtnak hrik an ngei lo.
“Zei khom si ah, amah pawng a rak ummi pawl le amah he inn khat ah um ṭimi minung 2 cu tuni Ningani ahhin kan test ṭhan hna lai,” ati.
Omicron hi Malaysia ram chung ahcun an i chawn rih hna lo. Ram chung ahcun a karh rih lo.
