‘UN ah Myanmar ram aiawhnak nawl na kan pek lo’ tiin uknak firtu Kawl Ralkap cozah nih UN a mawhchiat.
Kawl Ralkap nih UN ah Myanmar ram aiawh dingin a sokmi cu nizaan ah UN nih a ceih nain cohlan/lo biachahnak tuah rih lo dingin bia a chah caah Aung San Suu Kyi acozah palai Pu Kyaw Moe Tun nih pehtlai in a aiawh chung rih lai – mah hi hmet law rel khawh asi.
Myanmar ralkap cozah biachimtu ralbawi Zaw Min Tun nih, “Hitin UN nih bia a chahmi hi kan ram thil sining he aa tlak lo pinah kan ram a ummi hmanh a kan theihpiak lo bantuk asi,” tiin UN cu a mawhchiat.
“UN ah kanmah nih Myanmar ram aiawh dingin, kan ram upadi le ramdang upadi ningin kan sok peng ko lai,” ati.
Myanmar le Afghanistan kong cu UN Chungtel Cohlangtu Kawmiṭi nih hmai zarh ah UN General Assembly sinah thawng a thanh lai. UN chungtel ram 193 dihlak nih aa khat tein lungtlinnak an ngeih lo ahcun vote thlak in bia chah asi te lai.
