US ram ah ṭihnung tukmi COVID-19 hrik thar Omicron an hmuh ve cang. South Africa ram a tlawnnak in a hung kirmi pakhat sinah an hmuh.
“Amah cu November 22 ah South Africa ram in a hung kirmi si. Raikhamsi tling teing aa chun cangmi asi ko nain COVID-19 zawt hmelchunhnak tlawmpal a tuar, nain atu cu ṭhat lei a panh deuh cang,” tiah US COVID Phu hruaitu Dr. Fauci (hmanthlak) nih White House ah thawngla pawl sinah a chim.
“Raikhamsi voi 2 ning tein aa chun cangmi asi ko nain voi 3nak cu aa chun lomi asi,” ati.
‘Omicron’ tiin min an sakmi COVID-19 hrik thar cu South Africa ram ah an hmuhmi asi. COVID-19 hrik kha minung tampi an i chawnh tikah duhsah tein aci aa thleng lengmangmi asi. Voi tamtuk aa thlen cang caah a ṭhawng chin lengmang i chawnh le thih a fawi chin lengmang. Cun, raikhamsi hi hmasa COVID-19 hrik in sermi asi caah Omicron a kham kho tuk lo. A herh ningin Omicron a kham kho deuhmi raikhamsi zong ser ṭhan dingin scientist pawl nih hlathlainak an tuah lio asi.
Cucaah, US President Joe Biden nih South Africa le pawngkam ram 7 cu US tlawn a phih hna. Australia zong nih South Africa le pawngkam ram 8 a phih ve hna. Israel lebang nih cun ramkip a phih dih hna.
Vawlei Ngandamnak Bu (WHO) nih, “Omicron hi ṭihnung tukmi COVID-19 hrik thar asi…,” tiin thawng a thanh cang.
Omicron cu Australia, Canada, Japan, Hong Kong, Israel, tbk ram 30 hrawngah an hmuh cang.
US ram chung ahcun atutiang ahcun Omicron a karh rih lo.
South Africa ram ahcun Omicron a karh tuk luakchuak cang. COVID-19 zawtnak ngei an hmuh tharmi hna chungah cheuli-cheuthum cu Omicron lawngte an si.
