Malaysia ram ah khua a sami Sui Lian Thang nih April 3 ah mual a kan liam tak.
Sui Lian Thang cu Kuala Lumpur in ahawi le pathum he Kluang Selangor Teluk Intan ah (31/03/21) ah a riak in riantuan ah an kal.
Ani 4 nak (03/04/21) Zarhte zaan 9:30pm ah ruahlo tukin an riantuannak ah electric mei hri nih a leih sual i a hawile nih an zuanhnawh ko nain caan raulo te ah atu bantuk in a nunnak liam colh.
Aruak cu nawlngeitu Police nih Hospital Tanjung Karang ah an kalpi. Doctor te nih Body Operation an tuah hnuah a hnalung zong athalo tiah lunghrinhnak an ngei.
Atulio cu Kawlram abuaituk lio a si caah khua ah ruak kuat ahar an ti nain kuat ding in timhtuah a si. Kawlram kuat khawhnak caah a tlamtlinnak hnga thlacam bawm hna u sih.
Zeitik ah dah an kuat te lai ti cu a fiang rih lo. Siizung lei nih ruak lak khawh a si cang an ti hnu ah kuatnak kong a fiang te lai.
Sui Lian Thang cu Kyarinn khuami Pu Hrang Ta le Pi Ngun Thlia hna i an fale paruk lakah pahnihnak fapa a si.
Kum 2011 ah Malaysia a rak phan. Amah hi Malaysia Kyarinn Christian Fellowship (MKCF) ah EC upa pakhat a si i Fellowship nih an i bochan ngaimi a si.
Minunnem le mitoidor, mithinlungtha a si caah mi tampi nih an tlaihchanmi a si.
Tan takmi chungkhar nan ngaihchiatnak kan in tuarpi ve hna. Bawipa nih intuar khawhnak in pe ko hna seh. – MKCF
