Malaysia Chinmi 2 COVID-19 in an thi, tiah James Bawi Thang Bik (hmanthlak) nih a chim. James cu Malaysia Chinmi zohkhenhtu bu Alliance of Chin Refugees (ACR) Chairman asi.
James Bawi Thang Bik: Atu lio Malaysia um Chinmi kan i ralrin deuh hau ngaimi pakhat cu covid-19 positive a simi cheukhat cu home quarantine (inn chung te) ah um duh loin zeihmanh a poi lo tiah a leng ah an duh poh in an chuak tiin thawng kan theih. Mah hi a poi kho tukmi a si.
Atu hi Chinmi chung in COVID-19 ruang ah a thimi mithi pahnih an si cang.
Zawtnak a ngei cia lomi caah cun tih a nung tuk lo na tein, mah bantukin zei rel huaha loin leng a chuak i mi inn va len a hmangmi hna nih a va lennak hna chungkhar chung i zawtnak a ngei ciami minung pakhatkhat sin ah COVID-19 a chawnh sual hna ahcun a nunnak caah tih a nung tukmi si.
Mah caah cun kan theih hngalh hawi le chung in slole member chung in positive a si mi an um sual ah cun a inn chung te ah ni 10-14 tiang si lo ah a zawtnak negative a si tiang a leng chuak lo in a inn chung te ah um ding ah tha tein chimh hna an hau.
Covid positive a simi nih midang zawn ruahnak ngeih in mah tein i thei in mah inn chung te ah home quarantine ah lungsau tein um khawh i zuam ding a si.
James cu The Chin Express nih kan chawnh i, “COVID-19 in a thimi hi Zomi an si. Kum 40 hrawng pa veve an si. Zunthlum le thikai zawtnak a ngei ciami an si,” tiah a chim.
Malaysia Chinmi zohkhenhtu bu a si vemi Chin Refugee Committee (CRC) nih, “kanmah CRC member chung ahcun COVID-19 in a thimi an um lo, a zawmi balte cu minung 10 hrawng an si cang, a dam cangmi zong an um,” tiah a chim.
