Port Dickson rili ah a paam Chinmi 2; Pu Van Biak Thawng, kum 32 (Malsawm khuami) le Vaal Van Lian Cung, kum 29 (Tinam khuami) ruak tuni ah an hmuhmi hna kong cu Malaysia cozah media Bernama nih atanglei bangin a ṭial.
Liamcia ni 2 ah Port Dickson rili ah a tlami kum 30 hrawng Myanmar rammi 2 ruak cu tu zingka ah an hmuh hna.
Negri Sembilan le Melaka Malaysia Rili Zohkhenhtu Zung bawi Captain Haris Fadzillah Abdullah nih, “Ruak pakhatnak cu tu zingka 8:20am ah Tanjung Tuan nitlakthlanglei falong 3 hrawngah khuami ngatlai pakhat nih a hmuh,” tiah a chim.
“Nazi pakhat hnu hrawngah, mahka hmun cun aa hlat tuk lonak ah ruak pakhat cu an hmuh ve. A herh ningin tawlrel dingin ruak cu palik sinah kan ap,” ati.
Myanmar rammi 2 cu UNHCR card aa tlaihmi an si i hika pengkulh ah rianṭuanmi an si. December 18 zaanlei 1:30pm hrawngah rilikam ah ti lio an i timh lio ah an tlau.
Haris Fadzillah nih, “December 18 in ruak kawl kan thok. Meithat le Mikhamhtu Zung, Palik, Malaysian Civil Defense Force, tbk cozah zung tampi in minung 50 hrawng nih kan kawl hna.
“Rilikam in a thuhnak lei meng 20 hla tiang kan kawl hna.
“Atu lio cu Malaysia ram ah Fur Caan (ruahpi sur le thli hran lio) asi i nikhua a chiat lengmang caah hi bantuk vanchiat nan tonnak hnga lo, ahopaoh nih rili (kaanche) kal hrial uh,” tiin mipi sinah siaherh bia a chim.
Malaysia cu October in March thla tiang hi Fur Caan (Monsoon season) asi i ruahpi sur, tilian le thlichia hran a tam lio caan asi.
