December 18 ah Port Dickson rilikam ah Christmas nuamhnak an tuah lio ah rili nih a lakmi Chinmi 2 ruak cu tuni December 20 an hmuh cang hna.
December 18 chunnitlak an kawl hna, nizaan December 19 chunnitlak an kawl ṭhan hna nain an hmu kho hna lo. Tuni December 20 ah an va kawl ṭhan hna i an hmuh hna hi si.
Hakha peng Malsawm khuami Pu Van Biak Thawng, kum 32 le Tinam khuami tlangval Van Lian Cung, kum 29 cu Christmas nuamhnak tuah dingin hawikom he Port Dickson rilikam ah an kal hna.
Ni 3nk an caam December 18 ah chuncaw ei khawh in nuamhnak kan tuah lai an i lio ah rili nih a lak hna i an tlau, ni 2 hnu tuni lawngah an hmuh hna hi si.
Cozah lei in palik le meithat zung nih biatak tein an kawlpi hna. Port Dickson rili ah midang kal zong an khar chung.
Anmah he rilikam nuamhnak a kal vemi Pu Biak Ceu Thang nih, “Ni zaan zaan lei ka ṭin lai ah thaizing kan rak don ṭhan hna lai kan ti tak hna bantuk in tuni ahcun kan i tong hna,” tiah tuni ruak an hmuhka ah a chim.
“Sihmanh sehlaw a hlan kan i ton bantuk in capo saih le nih bu in a si ti lo, ka celh bak lo eee. Nain kannih zong ni nikhat cu kan ton hnga dingmi a si ko caah kannih zong Vanram kan rat tik ah kan dongte uh mu,” ati.
