Thlichia nih Philippines ram ah minung 100 leng a thah hna

A pin chiahru mi thlichia nih Nilini ah Philippines ram a den i minung 100 leng a thah hna. Minung ting 3 (300,000) leng nih an inn an zaam tak.

An ram nichuah-thlanglei state vialte a den dih. Thlichia cu a pinh tuk ahhin suimilaam 1 ah meng 120 a phan (120mph) an ti.

“Typhoon Rai” tiin bunh an bunhmi thlichia nih cun phone tung le mei tung tampi zong a thluk hrawh dih caah a dennak hmun tampi ahcun phone line zong a um lo i phone battery tunnak mei zong a um lo caah i pehtlaihnak a har tuk i a thimi le hliam tongmi zat hi rianrang tein le a dikthlir in hngalh khawh asi rih lo.

Atutiang ahhin a thimi minung 108 kan theih cang hna, tiah AFP media nih a thanh. AP media nih cun ‘minung 112 leng an thi cang’ a ti ve.

Thlichia ruangah tilian fak taktak a tlung chih i tilian le leimin nih minung tampi a thah chap men hna lai, tiah an zumh.

Ramkip Hartong Bawmtu Red Cross (IFRC) nih, “Hartong pawl caan sau deuh kan bawmh hna nak hnga Switzerland tangka 20 million hrawng kan herh,” tiah thawng a thanh.

“Rili pawng hrawng a ummi khua vialte cu thlichia nih a hrawh dih cikcek. Khuami inn, sizung le sianginn vialte zong thlichia nih a thleh baoh dih viar,” tiah Red Cross Philippines hruaitu Richard Gordon nih a chim.

“Minung tamtuk liangluang nih an inn, thilri le zeizong vialte an sung dih cikcek. Red Cross rianṭuan pawl nih a hmun ah tirawl an va bawmh cuahmah hna,” ati.

Rili pawng khuate pawl ahcun hartong mipi chanh dingin cozah nih ralkap, meithat le rili hngak ralkap thong tampi a thlah hna.

Philippines President Rodrigo Duterte nih thlichia hrawhmi khua pawl cu helicopter cungin a veh zoh hna.

A rianṭuan pawl nih helicopter cungin video an thlakmi zoh tikah Siargao, Dinagat le Mindanao tikulh state pawl hi fak bikin an rawkral.

Dinagat island cozah hruaitu Arlene Bag-ao nih, “Kan state cu thlichia nih ciam dihlak in a hrawh dih cikcek,” tiah a chim.

“Lothlo pawl an lo, ngatlai pawl tilawng le an pawcawmnak vialte cu lak awk tlak loin an rawk dih. Kan inn kan sung, vampang le cungcih vialte an zuang dih. Ti le rawl zong kan i za huaha ti lo,” ati.

Thlichia ruangah minung thong tampi cu inn ngei lo (homeless) ah an i cang hna.