Myanmar ralkap nih February 1 ah uknak a fir hnu cun rampumpi ah buainak lawngte in a khat i ramchung ummi hmanh nunnak kawl in Thailand le India ah an zaam cuahmah hna lio ah Malaysia cozah nih cun a ram um Chinmi pawl a tlaih hna i Kawlram ah a kuat peng hna.
February 1 in atutiang ahhin Malaysia cozah nih Chinmi 359 bak a tlaih cang hna.
Mah chungah 178 cu ralhrang Kawl Ralkap penmi Kawlram ah a kuat cang hna. 178 chungah 28 hi UNHCR card le catlap a ngeimi an si.
UNHCR card le catlap a ngeimi cu ‘ralzaam le ralzaam soktu an si’ tiin UNHCR nih theihpimi an si caah tlaih awk an si lo, nain Malaysia cu UN Ralzaam Sachoh ah minsen a thut lomi (ralzaam a cohlang lomi) kan si tiin a tlaih lengmang hna.
A taangmi Chinmi 181 cu Phungninglo Ramdangmi Thonginn (Camp/Depot) ah thong a thlak hna.
UNHCR cu Malaysia nih Camp ah kalnak nawl a pek lo caah Chinmi pawl cu chuahtu ngei loin paw khim huaha lo le harsa taktak in thonginn ah an um lio asi. Myanmar Tanzung nih a ton hna hlan lo thongthlak peng an si lai. Myanmar Tanzung nih a ton hna zongah Kawlram (Kawl Ralkap kut) ah a kuat hna lai caah apoi taktak. Ton lo ah le thongtlak peng, ton ah le Kawl Ralkap sinah kuat …
“Malaysia cozah nih hitin Chinmi na tlaih hna i Kawlram na kuat pengmi hna hi kan lungṭha hrimhrim lo, ngol cang,” tiah Chin Nuhrin Covo Bu (CHRO) nih cathanh a chuah.
CHRO hruaitu chang Salai Za Uk Ling nih, “Hi tluk Myanmar boruak chiat lio ah, Malaysia nih ralzaam a sokmi pawl Myanmar ah na khirhmi hna hi cohlan khawh asi lo,” tiah cathanh in a chim.
“Liamcia caan zongah, Malaysia in a tlungmi cheukhat cu Yangon airport ah an tlaih hna i Insein Thonginn ah an thlak hna.
“Atu lio ah Myanmar na khirhmi hna hi Kawl Ralkap nih hramhram in ralkap a luhter hna lai ti zong kan phang.
“Malaysia cozah nih NLD cozah he lungtlinnak na rak ngeihmi a um zongah na ngol chung le Myanmar rammi pawl khirh na ngol chung a herh.
“Atu lio Chin state boruak a chiat tuk caah, Malaysia cozah nih na khirh hna ahcun harnak an tong kho. Atu hi Chin state cu Kawl Ralkap nih internet a phih caah i pehtlaih zong a har tuk. Peng cheukhat ahcun Kawl Ralkap nih an hmuhmi paoh an kah hna i Chinmi 40,000 leng ramri tan in India ram ah an zaam cang. Mindat pengah ralzaam 20,000 leng rawl ei awk ngei loin an vai cang,” ati.
