US cozah nih nudokpadok passport a serchuah cang. Midang cu nu kan si ahcun kan passport ah “Sex: Female” tiin an ṭial i pa kan si ahcun “Sex: Male” tiin an ṭial. Nudokpadok passport ahcun “Sex: X” tiin an ṭial.
US Ramdang Vuanci Zung nih, “Nu/pa sinak langhter a duh lomi nudokpadok pawl caah ‘Sex: X’ timi American passport kan ser cang,” tiah Nithumni ah a thanh.
Sex: X passport cu Canada, Australia, Germany, India, Pakistan, New Zealand, Denmark, tbk ramdang pawl zong nih an tuahnak a sau pah cang. US ram ahcun tutan hi avoi 1nk bik an tuah asi.
Ramdang Vuanci Pu Antony Blinken nih June thla ah, “Sex: X passport kan tuah te lai…” tiin a rak chim bal cang, tutan hi avoi 1nk bik an tuah taktak asi.
Avoi 1nk bik Sex: X passport an pekmi US rammi cu Dana Zzyym, kum 66 (hmanthlak) hi asi.
Anih hi US ralkap pension a la cangmi nudokpadok asi i nudokpadok pawl caah Sex: X passport tuahpiak dingin US Ramdang Vuanci Zung taza a rak cuaitu asi.
Liamcia caan ah passport a rak sok lengmang nain soknak form i sex/gender timi zawn ah nu nih ‘female’ thim in pa nih ‘male’ thim dingmi kha i thim loin ‘X’ tiin a rak ṭial caah passport an pe duh bal lo. Mah ruangah passport tawlreltu US Ramdang Vuanci Zung cu ‘ka nuhrin covo na buar….’ tiin taza a rak cuai.
Dana Zzyym nih, “Ka passport tharte i Sex timi zawn ah fiang taktak in X an ṭialmi ka hmuh cu kai lawmh tuk ahhin ka mitthli kuarkuar in kai thlak,” tiah aa lawmhnak kong a chim.
“Kum 6 hnu ah, nu ti zongin aa ka ti lo i pa ti zongin aa ka ti lomi passport ka ngah cu ka zalong in ka lawm tuk hringhran. Hihi ka sining te asi. Mah hlan vialte cu ka caah thongtlak bantuk asi,” ati.
