VIDEO: Japan ser ‘a zuang khomi’ motorcycle hi nai cawk ve lai maw?

Japan company tharte nih a zuang khomi bike a sermi cu Nihnihni khan zuar a thok cang. Na duh ve ahcun $680,000 in cawk khawh asi.

62 mph (100 kph) rang in minutes 40 chung a zuang kho.

A zuang khomi bike cu ‘XTurismo Limited Edition’ tiin an auh i drone company A.L.I. Technologies nih a sermi si.

A pum cu bike (motorcycle) bantukin an ser i anak le senmi color in an ser. A kamlei ah zuannak caah pangka an bunh.

Atutiang ahcun Japan cozah nih zalampi ah zuannak nawl a pe rih lo. Certual, private area le mipi um lonak hmun pawl lawngah i cit khawh asi rih.

A sertu company nih cun, “Lam a chiatnak hmun pawl ah hartongmi pawl bawmhnak caah a ṭha tuk lai,” ati.

A sertu company cu Japan company tumtlang Mitsubishi Electric le US company Joby Aviation le Israel company AIR pawl nih biatak tein an dirkamh. Mah company pawl hi a zuangmi taxi ser aa timmi pawl an si.