Japan Siangpahrang fanu Mako nih a siangpahrang sinak hlawt in college a kai lio i a tlangval mi sawhsawh a vat taktak cang. An thawngpang nih Japan ram cu lihnin bangin a hninh dih, vawleipi a cul.
Japan ram ahcun siangpahrang fanu nih mi sawhsawh vat khawh asi lo caah a siangpahrang sinak a hlawt hi si. Siangpahrang sinak in a tlangval a duh deuh.
“Mako le a tlangval Kei Komuro i ṭhitumnak catlap cu siangpahrang chungkhar nih Nihnihni ah kan ap cang i atu cu nuva an si taktak cang,” tiah Siangpahrang Chungkhar nih a thanh.
![](https://thechinexpress.com/wp-content/uploads/2021/10/1000.jpeg)
Tuanbia lawngah kan theih lengmangmi Zawl Tling le Ngan Bawm tuanbia cu nihin ah a taktak in Japan ram ah kan hmuh.
Zawl Tling bantuk a simi Mako nih, “Ka caah cun Kei Komuro hi zei zong vialte nakin a sunglawi deuh. Kan i co khawhnak ding ahcun i ṭhitum dah lo thim ding dang kan ngei lo,” tiah Japan rampumpi TV ah thawngthanhnak a tuah.
“Kan nunnak thar kan thok cang lai i harnak thar tampi kan tong ko lai, nain liamcia caan zongah harnak tampi kan rak pahṭi bantukin kan pahṭi ko lai,” ati.
![](https://thechinexpress.com/wp-content/uploads/2021/10/1000-6.jpeg)
Liamcia kum 3 lio ahkhan aa ṭhium ding an rak si cang nain siangpahrang fanu nih mi sawhsawh vat khawh asi lo caah khenkhamtu phunkip an rak tong, nain Zawl Tling le Ngan Bawm bang zei bantuk khenkhamnak hmanh nih a kham kho hna lo i atu ahcun an i um taktak cang.
Liamcia thla tlawmpal chung cu Japan media pawl nih a tlangval Kei Komoru an thangchiat tuk caah Siangpahrang fanu Mako cu a ngaihchia tuk i lungkuai in a zaw, tiah siangpahrang chungkhar sibawi nih a chim.
An tonmi hi ngaihchia tuk asi. An i ummi cu catlap cung minsen thutnak lawngin an tuahpiak hna i rawl hrawmnak puai zong an tuahpiak hna lo. Laimi ṭhitum puai tluk hmanh in puai an tuahpiak hna lo.
![](https://thechinexpress.com/wp-content/uploads/2021/10/1000-5.jpeg)
Mako cu an i lum lai ni 3 ai duh ahkhan kum 30 a tling. Anih hi Japan siangpahrang Emperor Naruhito a tunu asi.
Mi sawhsawh vat ai thim caah a siangpahrang sinak a sungh pinah siangpahrang covo le tangka vialte a sung dih.
Japan siangpahrang chungkhar phungphai bangin, Mako cu siangpahrang sinak a hlawt caah a donghnak bik a covo tangka 140 million yen ($1.6 million) an pek nain media pawl nih a vapa an thangchiat tuk ruangah a thinhung rua, aa lak duh lo.
![](https://thechinexpress.com/wp-content/uploads/2021/10/1000-4.jpeg)
A thaisung Kei Komuru he hin Tokyo International Christian University an rak kai lio ah aa uarmi an si. Kum 2017 ahkhan “kan i um lai…” tiin thawngthanhnak an rak tuah cang nain an rak i um kho lo.
Kum 2018 ah Kei Komoru, kum 30 cu US ram New York ah upadi kai dingin aa thawh i kan hnu thla lawngah Japan a tlung i atu an i um colh hi si.
A rauh hlan ah US ram ah peem an i tim.
Siangpahrang fanu Mako a duhdawtnak ṭhawn zia hi amak ko…
A linsami thawngpang pawl;
- Hakha ah Ralkap nih Dr. Sakhong inn (CHRO Zung) an ting – hmet law relchap
- Thantlang a kaangmi inn 160 leng chungah dawr 100 an i tel
- Thantlang ah khanghmi inn 164 a ngeitu min pawl
- Chin state kong CHRO nih US cozah an chim
- Malaysia nih Chinmi 359 a tlaih hna, 178 Kawlram a kuat hna