Malaysia cozah nih online in mi tangka a hlengtu minung 18 a tlaih hna, ngakchiabik hi kum 15 a si.
Johor palek bawi Datuk Ayob Khan Mydin Pitchay nih, “March 7, zaanlei sml 4:15pm in zaan sml 10pm kar ah Kempas le Setia Indah ah a ummi inn ah tlaihkhihnak kan tuah i minung 18 kan tlaih hna.
“A dihlak in Malaysia rammi an si i nu 3 an i tel. Kum 15 in kum 35 kar an si,” tiah a chim.
Palek nih tlaihkhihnak an tuah lio ah mobile phone 60, ca aa ttialmi notebook uk 13, an hlenmi hna phone number le ATM card 17 an tlaih chih.
Mi hrokhrol pawl nih hin Facebook cawngia in mi an hlen hna.
“An boss te nih mi nan hlen khawh hna ahcun thla khat ah RM2,500 le bonus 5% nan hmu lai tiah an ti hna.
“Mi hlen an thok cu thla 1 a tling deuh rih lo i an boss te nih lahkhah zong an pe rih hna lo.
“Mi hlengtu pawl nih an hlenmi hna cu Whatsapp siloin phone in an chawnh hna, nan chungkhat/hawikawm ka si, tangka rak ka cawi tiin an ti hna.
“Hlen tongmi nih an chungkhat/hawikawm an si/lo an hlat hnu lawng ah hlen an tonmi an i hngalh,” tiah Ayob Khan nih a chim.
Tlaihmi pawl cu biahal dingin palek sakhan ah an hren hna.
Palek nih mihrokhrol hna i an boss, hlen tongmi milu zat le tangka an sunghmi an hlat lio a si.
Palek bawi Ayob Khan nih, “Nikum chungah Johor palek nih mihlen case 209 kan tlaih i RM1.7million an hlen hna.
“Tu kum, February thla tiangah mi hlen case 48 kan tlaih cang i mi an hlenmi tangka RM398,000 a si.
“Cucaah, mipi nih kan i ralrin ngai ding cu phone call mi le cakuat a lutmi paoh i zumh lo ding hi a si. A hlei in tangka kuat kong ah kan i ralrin taktak a hau,” tiah a chim. – The Star
