Tuni khuadei hlan ah Malaysia Lahwahkah nih Selangor Wholesale Market ah phungninglo ramdangmi 72 a tlaih hna, UNHCR card ngei 39 an i tel.
1am in 4am tiang tlaihkhihnak an tuah. Ramdangmi cu tlaih le thongthlak an ṭih tuk caah lungrethei in an i thup hna. Cheukhat cu nga bawm phen le luti khor chung hna ah an i thup.
Tlaihmi 72 cu UNHCR card aa tlaihmi 39, work permit ngei lo Myanmar rammi 9, Bangladesh 19, Indoesia 3, India 1 le Nepal 1 an si.
Ramchung Vuanci Changtu Pu Ismail Mohamed Said nih, “Kan tlaihmi hna hi kum 20 in 50 kar lawngte an si. Phungninglo in Malaysia ummi an si caah kan tlaih hna,” tiah a chim.
“UNHCR card an i tlaihmi zong hi kan lunghring.
“UNHCR card dik a si/lo hlat dingin kan tlaih chih lawlaw hna, cun rianṭuannak nawl (work permit) an ngeih/lo zong kan hlat chih lai.
“A herh ningin hma lak dingin Selangor Lahwahkah Zung ah kan kalpi hna lai,” tiah thawngla pawl a chimh hna.
Lahwahkah nih Selangor Wholesale Market ah COVID-19 zulhphung SOP an zulh/lo zohfelnak a tuah pah in ramdangmi 72 a tlaih hna hi si.
“Hmun kip ah SOP an zulh/lo zohfelnak le tlaihkhihnak kan tuah peng lai,” tiah a chimchap.
SOP zulhternak hruaitu Pu Azman Adam nih, “June 1 in atutiang ah rampumpi rianṭuannak hmun 42,552 bakte kan zohfel cang i SOP a zul lomi dan kan tatmi hna dihlak hi RM2.03 million asi cang,” tiah a chim ve.
