Malaysia ram hruaitu nih “Mizaw 4,000 tang an si hlan lo lockdown kan peh lai” ati

,

COVID-19 karh kham a hauh caah thaizing June 28 ah a dong ding full lockdown (FMCO) cu kan sauh lai tiah Malaysia Rampumpi Viancichoh Pu Muhyiddin Yassin (hmanthlak) nih a chim, tiin cozah media Bernama nih tuni ah thawng a thanh.

Atu hi Malaysia cu full lockdown an tuah lio si i thaizing June 28 ah a dong ding si nain, “Pu Muhyiddin Yassin nih ni fatin COVID-19 mizaw 4,000 tang an si hlan lo paoh cu lockdown kan donghter lai lo ati,” tiah Bernama nih a thanh.

Nizaan kha Malaysia ah COVID-19 mizaw 5,803 an hmuh hna. Mah hlan ni 3 chung zong mizaw 5,000 leng peng an hmuh hna.

COVID-19 in a thimi zong an tam chin lengmang. Liamcia ni 3 chungah mizaw 80 hrawng peng an thi. Nizaan kha 81 an thi.

Malaysia rammi cu cozah nih tangka a bawmh hna lai

FMCO ruangah mi tampi rianṭuan kan ngah lo i tangka lut kan ngeih lo caah inn man, ti le mei man, rawl cawknak, tbk kan harsa tuk hna.

Atu cu FMCO an tuahnak a sau tuk rih lo caah aa ning deuh, nain peh/sauh an timh caah mi tampi kan harsat ning a zual tuk lai.

Cucaah, “Malaysia rammi pawl cu cozah nih tangka kan bawmh hna lai, tangka bawmhnak kong cu thaizing silole kiptuh ah kan thanh lai,” tiah Pu Muhyiddin Yassin nih a chim.

Malaysia um Chinmi cu bawmtu kan ngeih lo caah kan har taktak lai. Ahlei in fa tam a ngeimi chungkhar pawl an tuar khun lai.