Perak state, Kampar khua ah a ummi dum pakhat ah Myanmar pa pakhat cu a ruak in an hmuh caah palek nih a that tu tlaih dingin an kawl lio a si.
Kampar khua palek bawi Hasron Nazri Hashim nih, “April 5, zinglei sml 7:00am ah kum 30 hrawng Myanmar pa cu a lu le a hmai ah hliamhma he a ruak in an hmuh.
“Myanmar pa cu bawngbi tawi lawng aa hruk. A ruak cu dum ngeitu nih thlam pawng ah a hmuh.
“Thil sining kan hlat tikah a thimi le mithat tu hi zaanttim sml 1-2am kar ah zuu an ding tti i an i vel.
“Mithattu hi kum 30 hrawng a si ve. Mithattu pa nih sobul aa lak i mipa cu a tuk,” tiah a chim.
A thimi pa cu a pum ah card/catlap an hmuh lo caah mizei a si an hngal lo.
Thahnawn a cannak hmun i thil sining a zohtu team nih thi aa nehmi sobul, pe 1.9 saumi namtong, zuu thol le zuu dur pawl an hmuh hna.
Palek nih zaanlei sml 3:30pm hrawng ah a thimi pa le mithattu pa he rian a ttuan ttimi pakhat cu bus station ah an tlaih.
Mipa nih “ka it cang i thil a can lio ka hmu lo”
“Nain, mithat tu pa nih a thilpuan bag he zaam aa timh lai ah thil sining a ka chim. Ka lau tuk i, zaam kaa tim ve” tiah palek sin ah a chim.
Palek bawi Hasron Nazri nih, “Atu hi mithattu pa cu kan kawl liopi a si.
“Lainawng case in case kan on khawh men,” tiah a chim.
Myanmar pa ruak cu Raja Permaisuri Bainun sizung ah pum hlai dingin an kuat cang.
