Myanmar minta Ye Deight cu sandahpiahnak ah aa tel ruangah atu hi ralkap nih an tlaih.
Ye Deight cu ralkap duhlo langhter cawlcanghnak ah i tel ruangah Sualnak Upadi Dal 505(a) le tlaih dingin kawlmi minthang tampi lakah aa tel vemi a si.
Yangon, Thamine Lann Sone ah April 3 zaanlei ah an tlaih.
Ralkap nih tuni thawngthanhnak a tuahmi ah Ye Deight cu kan tlaih lio ahhin ritsii he kan tlaih a ti.
Ye Deight cu hlan lio ah ritsii ruangah kum caan saupi thongtla balmi a si. Thonginn in a chuahnak hmanh a sau rih lo.
Ye Deight a fan cheukhat nih ralkap chimmi ritsii he kan tlaih timi cu an zumh lonak pawl online ah an ttial hna.
Minta Ye Deight cu ralkap duhlo langhter sandahpiahnak ah biatak tein a cawlcangmi a si.
Myanmar ram thimnak lai i Pi Aung San Suu Kyi mee pek sawm a kalnak zongah aa tel balmi a si.
Ralkap uknak duh loin a lamkip in dohnak ah aa telmi minthang 80 leng cu ralkap nih Sualnak Upadi Dal 505(a) in case a tuahpiak hna.
Cu chungah minta Lu Min le Ye Deight cu an tlaih cang hna.
Ralkap nih tazacuainak case a tuahpiakmi hna hi an sual ko ti ahcun kum 3 tiang thongthlak khawhnak upadi a si. – RFA
