Ni fatin COVID-19 mizaw 4,000 tang an si tikah full lockdown kan dorh lai, tiah Malaysia ram hruaitu Rampumpi Vuancichoh Pu Muhyiddin Yassin (hmanthlak) nih tuzaan ah TV in thawngthanh.
“Kan Ram Damnak Simanking caah lockdown (MCO) dot 4 in kan ṭhen. Atu hi dot 1nk chungah kan um lio asi.
“Ni fatin COVID-19 mizaw thar 4,000 tang an si cun khapmi tampi kan dorh deuh lai. Rianṭuan zong duhsah tete in kan on thluahmah lai.
“MCO Dot 2nak cu kan rammi 10% hrawng raikhamsi kan chunh hna hnu ah aa thok te lai.
“Dot 2nak aa thok tik zongah peng dang le state dang kal cu kan phih rih ko lai. Cun, zatlang cawlcanghnak pawl zong phih an si rih lai.
“Dot 2nak ahcun rian tam deuh ṭuan kan onh cang lai. Rian 80% hrawng cu ṭuan an ngah cang lai, nain cheukhat cu ṭuan kan phih rih hna lai.
“Dot 2nak ahcun mirang vawlei sehzung ti bantuk sehzung le a himmi construction rian, cun inn in rianṭuanmi caah computer le electronic thilri zuar, dawr ti bantuk zong ṭuan kan onh te hna lai.
“Nain, thil ṭhitnak sehzung le sehṭi (furniture) dawr ti bantuk pawl cu ṭuan kan onh rih hna lai lo.
“Ni fatin mizaw 2,000 tang an si tik le sizung mizaw zual ihkhun a lawn deuh tik, cun kan rammi 40% raikhamsi voi 2 cio kan chunh hna tikah MCO dot 3nak ah kan lut te lai. Mah tik cun rian dihlak dengmang ṭuan kan on cang lai. Zawtnak a tam tuknak hmun pawl lawng ṭuan khap an si te lai.
COVID-19 raikhamsi tam deuh cu ni 20 dan in voi 2 chunh haumi lawngte an si.
“Mah pawl hi August thla dongh ahcun kan tlamtlinh lai tiah kan zumh.
“Ni fatin mizaw 500 tang an si tik le kan rammi 60% raikhamsi voi 2 cio kan chunh hna tikah MCO dot 4nak ah kan lut te lai.
“Hihi October thla dongh ahcun kan tlamtlinh khawh lai tiah kan zumh.
“Hi MCO dot 4nak ahhin cun ahopaoh zalong tein punghman in um khawh si cang lai.
“Rian vialte ṭuan kan onh dih te lai. Zatlang cawlcanghnak tampi kan on cang lai. State dang le peng dang kal zong kan on cang lai (zulhphung cu um lai).
“Mah hi cu ni fatin COVID-19 mizaw an tlawm tuk tik, sizung vialte a himmi level an si tik le kan sang le khua ah minung tampi raikhamsi chunh dih an si tikah kan thok te lai,” ati.
