Refugee le ramdangmi pawl cu June thla hrawngah COVID-19 raikhamsi kan chunh hna lai, tiah Malaysia Science Vuanci Pu Khairy Jamaluddin (hmanthlak) nih tuni ah a chim.
Tuni ah Malaysia Ngandamnak Vuanci Datuk Seri Dr Adham Baba le raikhamsi chunh hruaitu Science Vuanci nih media sin thawngthanhnak an tuah lio ah a chim hi si.
UN card/catlap zong a ngei lomi le passport zong a ngei lomi phungninglo ramdangmi zong kan chunh dih hna lai, ati.
Refugee he, phungning he ninglo he ramdangmi paohpaoh chunh dih an si lai
“Kan hnu zarh ah Ramchung Vuanci he refugee le ramdangmi pawl raikhamsi chunh kong meeting kan tuah.
“Refugee pawl cu Ramchung Vuanci Zung (Lahwahkah) le UNHCR he i bawm in kan chunh hna lai.
“Khoh 3nak raikhamsi chunh tikah kan chunhte hna lai. June thla hrawng in kan thok te lai.
Atu cu an rammi pawl an chunh thluahmah hna lio asi
“Sehzung le adangdang ah rianṭuanmi ramdangmi vialte zong kan chunh dih hna lai. An boss pawl nih min cazin an kan pek lai.
“UNHCR card/catlap zong a ngei lomi, passport le visa zong a ngei lomi phungninglo ramdangmi pawl zong an min cazin kan pe uh tiin boss vialte kan hal dih cang hna. Kan chunh dih hna lai,” ati.
Phungninglo ramdangmi pawl cu an tlai hna lai maw?
February thla ahkhan media pawl nih an rak hal i “raikhamsi chunh a duhmi phungninglo ramdangmi pawl cu kan tlai hna lai lo” tiah a rak leh hna.
“Phungninglo ramdangmi zong i chunh dih dingin Ramchung Vuanci Zung nih ramdang tanzung pawl, zatlang bu le NGO pawl zong a pehtlaih thluahmah hna,” ati.
Tuni zongah “phungninglo ramdangmi pawl cu a kan tlaih lai ti an phang tuk sikaw zeitin dah an in zumh khawh hna lai?” tiah media nih an hal ṭhan.
“Mah kong hi Ramchung Vuanci Zung (Lahwahkah) he saupi kan i ceih. Refugee le ramdangmi raikhamsi chunhnak policy ser dingin Ramchung Vuanci Zung nih cozah meeting ah a chim lai i cozah nih bia a khiahte lai,” tiah a leh hna.
“Nain, UNHCR card a ngeimi pawl cu UNHCR he i bawm in chunh dingin kan lungtling cang.
“UNHCR le NGO he i bawm in kan chunh hna cangka in, zeihmanh piahtana um lo tein a kan chunh ko tiin an hawile an chimh cio hna lai i anmah tein an ra thluahmah ko lai,” ati.
Nawlpatnak: Malaysia ummi vialte nih an theihnak hnga SHARE ve. Website ngei pawl nih nan website ah copy lo dingin kan in nawl hna.
