Malaysia rili ah a paammi Chinmi 2 ruak tuni ah an vui cang

,

December 18 ah Malaysia ram, Port Dickson rili ah a nunnak liammi Chinmi 2 ruak cu tuni December 22 zaanlei 3pm ah tlamtling tein an vui khawh cang hna.

Hakha peng, Malsawm khuami Pu Van Biak Thawng, kum 32 le Tinam khuami tlangval Van Lian Cung, kum 29 cu an hawile he Port Dickson rilikam ah Christmas nuamhnak lengchuahnak an kal hna.

Pu Van Biak Thawng nih a fapa te a rohtakmi zoh ko ah ngaihchia khun ee

Ni 3nk an caam December 18 chun rawl ei khawh ah ti an i lio lio ah ti nih a lak hna i an tlau.

An ruak cu Chinmi lawng si loin Malaysia cozah lei in pali, meithat le mikhamhtu zung le rili zohkhenhnak zung, tbk in minung 50 leng nih an kawl.

Van Lian Cung

Ni 2 hnu December 20 zingka 8:30 hrawngah an hmuh hna. A herhmi thihnak certificate pawl tuah dingin an ruak cu sizung ah an chiah hnu tuni December 22 ah tlamtling tein vui khawh hi asi.

An ruak an hmuhka ah sizung kalpi dingin motor cung an khin lio – Dec 20

Atang ah ruak thlah lio video zoh khawh asi.

Ruah lo piin hitin an nunnak liam cu tantakmi chungkhar zei tlukin dah an ngaihchiat hnga mu …. Christmas lengchuah an kalṭi hawi Laimi vialte zong tuksum le ngaihchia in an um dih. An thawngpang a theimi vialte zong kan ngaihchia dih.

Kan biak Pathian nih tantakmi chungkhar hnem in lam hruai zungzal ko hna seh.