- COVID-19 rungrul thar Omicron hi Delta nakin let 4 in i chawnh fawi deuh
- Khrihfabu le khua, tbk in Christmas le Kum Thar puai ngan pipi tuah an khap
- Sinovac 2 nan i chunhmi nih Omicron a kham kho lo
- Sinovac 3nak nan i chun dih lai, aa chun lomi cu…
Malaysia Ngandamnak Vuanci Pu Jamaluddin nih, “Sinovac voi 2 aa chun cangmi kum 18 paoh cu hmai kum February hlan ah voi 3nak nan i chun dih lai,” tiah thawngthanh.
“Cun, kum 60 cung a simi paoh cu zei bantuk raikhamsi aa chunmi nan si zongah February hlan ah voi 3nk nan i chun dih ve hrimhrim lai.
“Nan i chunh lo ahcun, nan MySejahtera app ah ‘tling tein raikhamsi aa chun cang (fully vaccinated)’ timi kha ‘tling tein aa chun rih lo (incomplete)’ tiin aa thleng dih lai.
“Cucaah, tling tein (voi 3 ning tein) aa chun cangmi bantukin cawhvah zalonnak nan ngah lai lo.
“COVID-19 rungrul thar Omicron karh lo dingin kham kan duh caah atu bantukin voi 3nk chunh dih dingin bia kan khiah hi si.
“Voi 3nk (booster) chunhnak caah Raikhamsi Chunhnak Hmun (PPV) pawl zong kan on ṭhan cang hna lai. Klang Valley (Selangor le KL) ah on kan thok lai.
“Christmas le Kum Thar puai ngan tuah pakhat hmanh a ngah lai lo. Minung tlawmte in private in Christmas le Kum Thar puai hmete tuah lawng onh asi. Mah zong cu, puai tuahnak inn/hmun kal hlan ah nan inn ah mah-tein COVID-19 i test nak in nan i test hmasa lai.
Khrihfabu le khua, tbk in minung tampi in Christmas le Kum Thar puai tuah a ngah lai lo tinak asi. Hawikom le chungkhat he minung tlawmte in mah tein tuah lawng a ngah tinak asi.
“Omicron a karhnak ram pawl cu ‘ṭihnungmi ram’ cazin ah chiah an si lai i mah ram in Malaysia a hung tlawngmi paoh cu khumherh (quarantine) chung vialte an umkalnak hnuzulh dih an si lai.
“Atutiang hlathlainak an tuahmi zoh tikah, raikhamsi voi 2 aa chung cangmi le COVID-19 in a dam cangmi pawl zong Omicron nih a tlunh zawt khawh hna ti asi caah voi 3nk chunh nolh hi a herh tuk hringhran.
“Naite ah Kyoto University nih hlathlainak a tuah tikah, Omicron hi Delta nakin let 4 bak i chawnh fawi deuh.
“South Africa ah hlathlainak an tuah vemi ah, Pfizer raikhamsi nih hin Omicron hi 30% lawng a kham khawh – Pfizer aa chunmi minung 100 lakah 30 lawng Omicron nih a teih hna lo, a taangmi 70 cu a zawt ko hna.
“Hong Kong University nih hlathlainak a tuah vemi ah, Sinovac voi 2 chunhmi nih hin Omicron a kham kho lo.
Malaysia ram ah avoi 2nk Omicron rungrul ngei an hmuh cang. December 5 ah Nigeria ram, Lagos khuapi in a nu le unu he a rami kum 8 ngakchia nute sinah an hmuh. Malaysia rammi an si.
1nk cu November 19 ah university kai dingin a rami South Africa nu sinah an hmuh. Atutiang ahcun Malaysia ram chung ahcun a karh rih lo. Vanlawngtual ah ramdang in a rami sinah an hmuhmi lawng asi. Khua chung le sang chung ah a karh rih lo (an hmu rih lo).
