Malaysia um Chin ralzaam bu komh hruaitu upa hna le UNHCR Malaysia lutlai le riantuantu hna cu April 12, 2021 ah UNHCR zung ah tonbiaruahnak an ngei kho.
Hi tonbiaruahnak ah hruaitu upa lei nih a biapibik in an halmi cu mithar laknak kong, 2013 card chuhmi kong le ramthumnak kalnak kong asi. Hi halmi ah UNHCR lei nih an chimmi cu:
1. Mithar laknak kong (new registraion) ah a tu lio Covid-19 zawtnak le MCO ruangah mithar laknak hi kan tuah kho rih lo.
Asinain, zawtnak a thian i MCO hna um ti lo tikah auh hram kan thok te ko lai tiah an chim.
Zeitik in dah auh hram kan thok lai ti cu kan chim kho rih lo an ti. Cun a tu lio cu Card/Catlap nithla a dih cangmi hna tu kha kan auh lio hna asi ti zong an chimhchap.
Tlaihkhihnak lei kong zong ah Malaysia cozah sinah Geneva UN zung he i bawm in Myanmar rammi caah theihthiamnak ngeih ding zong kan chimh ko hna an ti.
Mithar kan auh hna tik zong ah an mah le sining zoh in pek awk aa tlak le tlak lo kan zoh lai i mithar paoh cun kan pe hna lai lo a ti. A hlan i Online in appointment a rak hal cangmi zong lungsau tein hngah rih ding asi lai.
2. Kum 2013 card/catlap chuhmi kong ah an chimmi cu an konglam (case) sining tha tein kan zohpiak hna i auh than awk ah aa tlak ko timi cu auh than ding in timhtuahnak kan ngei ko a ti.
3. Ramthumnak kalnak kong ah an chim thanmi cu US cozah nih mithar laknak ding minthut dingmi hi kan hngak ve ko. Cun a tu lio zong ah cheukhat cu ramthumnak ah kan kalter mi hna zong an um ko a ti. – CRC
